بنوں: سرکاری سکول کے استاد اور ایف سی اہلکار اغوا، پولیس اسٹیشن پر ڈرون حملہ

بنوں (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع بنوں میں سکیورٹی سے متعلق تین الگ الگ واقعات پیش آئے ہیں، جن میں ایک سرکاری سکول کے استاد اور ایک ریٹائرڈ فرنٹیئر کور (ایف سی) اہلکار کو اغوا کر لیا گیا، جبکہ ہوید پولیس اسٹیشن پر مبینہ ڈرون حملے میں دو ایف سی اہلکار زخمی ہو گئے۔

پولیس کے مطابق پہلا واقعہ تھانہ میریان کی حدود کے علاقے منڈیو میں پیش آیا، جہاں سرکاری سکول کے استاد نثار کو نامعلوم مسلح افراد نے اسلحے کے زور پر اغوا کر لیا۔ اطلاعات کے مطابق ملزمان انہیں زبردستی ایک گاڑی میں بٹھا کر نامعلوم مقام پر لے گئے۔ پولیس نے مقدمہ درج کر کے واقعے کی تحقیقات اور مغوی کی بازیابی کے لیے کارروائی شروع کر دی ہے۔

دوسرا واقعہ تھانہ جانی خیل کی حدود میں پیش آیا، جہاں فرنٹیئر کور (ایف سی) کے ریٹائرڈ اہلکار علی مر خان کو ان کے گاؤں سے نامعلوم مسلح افراد نے اغوا کر لیا۔ پولیس کا کہنا ہے کہ مغوی کی بازیابی اور اغوا کاروں کی گرفتاری کے لیے مختلف پہلوؤں سے تحقیقات جاری ہیں۔

ادھر ہوید پولیس اسٹیشن پر مبینہ طور پر دہشت گردوں نے کواڈ کاپٹر ڈرون کے ذریعے حملہ کیا۔ پولیس کے مطابق ڈرون سے فائر کیے گئے دو گولے پولیس اسٹیشن کے احاطے میں گرے، جن کے پھٹنے سے وہاں موجود دو ایف سی اہلکار زخمی ہو گئے۔

زخمی اہلکاروں کو فوری طور پر قریبی ہسپتال منتقل کر دیا گیا، جہاں انہیں طبی امداد فراہم کی جا رہی ہے۔ پولیس کے مطابق دونوں اہلکاروں کی حالت خطرے سے باہر بتائی جا رہی ہے۔

قانون نافذ کرنے والے اداروں نے تینوں واقعات کی تحقیقات شروع کر دی ہیں، جبکہ اغوا ہونے والے افراد کی بازیابی اور ڈرون حملے میں ملوث عناصر کی شناخت اور گرفتاری کے لیے کارروائیاں جاری ہیں۔ علاقے میں سکیورٹی مزید سخت کر دی گئی ہے اور اضافی نفری بھی تعینات کر دی گئی ہے۔