بنوں سی ٹی ڈی اور پولیس کی کارروائی، فائرنگ کے تبادلے میں 3 خطرناک دہشتگرد ہلاک

بنوں (ڈیلی اردو) – خیبرپختونخوا کے ضلع بنوں میں پولیس اور کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع پر مشترکہ آپریشن کیا، جس کے دوران فائرنگ کے شدید تبادلے میں تین دہشتگرد ہلاک ہو گئے۔

آپریشن تھانہ میریان کی حدود میں انٹیلی جنس اطلاعات کی بنیاد پر کیا گیا۔ پولیس اور سی ٹی ڈی ٹیم نے علاقے کا محاصرہ کیا تو دہشتگردوں نے گرفتاری سے بچنے کے لیے اندھا دھند فائرنگ شروع کر دی۔ جوابی کارروائی میں تینوں دہشتگرد موقع پر ہی مارے گئے۔

ہلاک ہونے والے دہشتگردوں کی شناخت مدثر عرف مدثری، تراب عرف عمر خطاب عرف ملنگ ولد رقیاز، اور محمد حسین عرف معاذ ولد شاد آیاز کے ناموں سے ہوئی ہے، جن کا تعلق مختلف علاقوں سے تھا۔

ترجمان پولیس کے مطابق یہ دہشتگرد پولیس اہلکاروں فرمان علی، نصرت، کامران، فیاض الدین، سکندر اور اے ایس آئی اصغر خان کی ٹارگٹ کلنگ سمیت تھانہ بسیا خیل، سٹی کینٹ، میرا خیل اور دیگر پولیس چیک پوسٹوں پر حملوں میں مطلوب تھے۔

آپریشن کے دوران دہشتگردوں کے قبضے سے بھاری تعداد میں اسلحہ اور گولہ بارود بھی برآمد کر لیا گیا ہے۔ سی ٹی ڈی ذرائع کے مطابق مارے گئے شدت پسندوں کے خلاف متعدد مقدمات درج تھے اور وہ عرصہ دراز سے سیکیورٹی اداروں کو مطلوب تھے۔

سیکیورٹی اداروں نے علاقے کو کلیئر کر دیا ہے جبکہ مزید ممکنہ سہولت کاروں کی تلاش کے لیے تفتیش جاری ہے۔