بنوں میں تخریب کاری کا بڑا منصوبہ ناکام، 10کلو گرام بارودی مواد کو ناکارہ بنادیا گیا

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں پولیس نے دہشت گردی کا ایک بڑا منصوبہ ناکام بنا دیا ہے۔ بنوں–پشاور روڈ پر واقع دوغڑا پل کو ایک بار پھر دھماکے سے اُڑانے کی کوشش بروقت کارروائی کے باعث ناکام ہو گئی۔

پولیس کے مطابق علی الصبح نواحی علاقے بسیہ خیل میں دوغڑا پل کے نیچے شرپسندوں نے رات کی تاریکی میں تقریباً 8 سے 10 کلو بارودی مواد ایک بالٹی میں بھری دیسی ساختہ آئی ای ڈی کی صورت میں نصب کیا تھا۔ بارودی مواد کو پل کے مرکزی ستون کے ساتھ باندھا گیا تھا، جس کا مقصد انفرا اسٹرکچر کو تباہ کر کے علاقے میں خوف و ہراس پھیلانا تھا۔

تاہم بم ڈسپوزل اسکواڈ بنوں نے بروقت کارروائی کرتے ہوئے آئی ای ڈی کو محفوظ طریقے سے ناکارہ بنا دیا، جس کے نتیجے میں پل اور عوامی املاک ایک بڑے نقصان سے بچ گئیں۔

اہل علاقہ نے پولیس اور بی ڈی یو کی کارروائی کو سراہتے ہوئے کہا کہ عوام کے زیر استعمال بنیادی ڈھانچے کو تباہ کرنے کی کوشش کرنے والے عناصر کسی رعایت کے مستحق نہیں۔ مقامی لوگوں نے بنوں پولیس کے ساتھ ہر ممکن تعاون کی یقین دہانی بھی کرائی۔

آر پی او بنوں سجاد خان نے بی ڈی اسکواڈ کے جوانوں کی کارکردگی کو سراہتے ہوئے کہا کہ عوامی انفرا اسٹرکچر کو نشانہ بنانے والے عناصر کے خلاف سخت کارروائی ناگزیر ہے اور ایسے عناصر کسی رحم کے حقدار نہیں۔

واضح رہے کہ چند روز قبل اسی پل پر آئی ای ڈی نصب کرتے وقت ہونے والے ایک دھماکے میں ایک شرپسند موقع پر ہلاک ہو گیا تھا۔