بنوں میں سی ٹی ڈی اور لکی مروت پولیس کا مشترکہ آپریشن، کالعدم تحریک طالبان پاکستان کا اہم کمانڈر ہلاک

لکی مروت (نمائندہ ڈیلی اردو) صوبہ خیبر پختونخوا کے ضلع بنوں میں سی ٹی ڈی بنوں اور لکی مروت پولیس کے مشترکہ انٹیلیجنس بیسڈ آپریشن میں کالعدم تنظیم تحریک طالبان پاکستان کا کمانڈر ہلاک ہو گیا۔

سی ٹی ڈی کے مطابق آپریشن کے دوران فائرنگ کا تبادلہ ہوا جس میں کالعدم تنظیم کا کمانڈر مارا گیا۔

پولیس کے مطابق تجوڑی روڈ نزد ملنگ اڈہ میں آپریشن کیا گیا تو وہاں موجود مسلح دہشت گردوں نے پولیس پر اندھا دھند فائرنگ شروع کر دی۔

پولیس پارٹی نے بھی جوابی فائرنگ کی جس میں ایک دہشت گرد ہلاک ہوگیا جبکہ اس کے دیگر ساتھی جائے وقوعہ سے فرار ہونے میں کامیاب ہوئے۔ ہلاک دہشت گرد کی شناخت ولی اللہ عرف ولی کے نام سے ہوئی۔ ہلاک دہشت گرد کے قبضہ سے اسلحہ اور دو عدد ہینڈ گرینیڈ و دیگر سامان برآمد ہوا۔

ہلاک کمانڈر کا تعلق کالعدم تنظیم تحریک طالبان پاکستان ٹیپو گل گروپ سے تھا اور کمانڈر عتیق الرحمن عرف ٹیپو گل مروت کا داماد تھا۔ ترجمان کے مطابق دہشت گرد کمانڈر سی ٹی ڈی بنوں، ڈی آئی خان و مقامی پولیس کو بم دھماکوں، پولیس و سکیورٹی فورسز پر حملوں کے کئی مقدمات میں مطلوب تھا۔