بنوں: پولیس کارروائیوں میں اہم کمانڈر سمیت 5 دہشت گرد ہلاک

بنوں (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع بنوں میں پولیس نے دہشت گردوں کے خلاف کارروائیوں میں بڑی کامیابی حاصل کرتے ہوئے 24 گھنٹوں کے دوران 5 خطرناک دہشت گردوں کو ہلاک کر دیا۔

خیبرپختونخوا پولیس کے مطابق آئی جی خیبرپختونخوا ذوالفقار حمید اور ڈی آئی جی بنوں سجاد خان کی خصوصی ہدایات پر چوکی فتح خیل واقعے کے بعد انٹیلیجنس بیسڈ آپریشنز شروع کیے گئے۔

کارروائیوں کے دوران چوکی فتح خیل حملے کے مبینہ ماسٹر مائنڈ زرولی کے بھتیجے حیات اللہ کو ہلاک کر دیا گیا، جو دیسی ساختہ بم (IED) بنانے کا ماہر بتایا جاتا ہے اور مبینہ طور پر بم رکشے میں نصب کر کے چوکی کو نشانہ بنانے میں ملوث تھا۔

پولیس کے مطابق ہلاک دہشت گرد کے ٹھکانے سے آئی ای ڈی بنانے کا سامان، بال بیرنگ، پرائما کارڈ اور بارودی مواد بھی برآمد کیا گیا۔ حیات اللہ متعدد سنگین وارداتوں میں مطلوب اور بدنام زمانہ ٹارگٹ کلر بھی تھا۔

اسی طرح مختلف کارروائیوں میں چوکی پر حملے میں ملوث دہشت گرد اسد یار اور دہشت گرد نعمت اللہ بھی ہلاک ہوئے، جبکہ مؤثر حکمت عملی کے تحت ہلاک ہونے والوں میں اہم دہشت گرد کمانڈر منصور بھی شامل ہے۔

مزید بتایا گیا کہ یہ دہشت گرد سیکیورٹی فورسز، سی ٹی ڈی، پولیس اہلکاروں اور معصوم شہریوں پر حملوں میں ملوث اور مطلوب تھے۔

ریجنل پولیس آفیسر بنوں سجاد خان نے کہا کہ شہدا کے خون کے ہر قطرے کا حساب لیا جائے گا، اور ضلع میں امن کے مکمل قیام تک دہشت گردوں کے خلاف کارروائیاں بلا تعطل جاری رہیں گی۔

انہوں نے کہا کہ آئی جی خیبرپختونخوا ذوالفقار حمید نے بنوں پولیس کو خصوصی شاباش دی ہے اور نقد انعامات کا اعلان بھی کیا ہے۔

آئی جی خیبرپختونخوا نے کہا کہ بنوں پولیس نے بہادری کی نئی تاریخ رقم کی ہے، دہشت گرد نیٹ ورک کو توڑنے کے لیے کارروائیاں جاری رہیں گی اور صوبے سے امن دشمن عناصر اور ان کے سہولت کاروں کا مکمل خاتمہ کیا جائے گا۔