بنوں کے احمدزئی میں فائرنگ، مبینہ دہشتگرد ملک زئی علی رحمان ہلاک

بنوں(ڈیلی اردو) خیبرپختونخواہ کے شورش زدہ ضلع  بنوں کے علاقے احمدزئی میں فائرنگ کے ایک واقعے کے دوران مبینہ دہشتگرد ملک زئی علی رحمان عرف کنکئی ہلاک ہوگیا۔

ذرائع کے مطابق ملک زئی علی رحمان ایک روز قبل احمدزئی کے علاقے میں ہونے والے فائرنگ کے تبادلے کے دوران ہلاک ہوا۔ ذرائع نے دعویٰ کیا ہے کہ وہ ایک اور مبینہ دہشتگرد اکرمہ کا والد تھا، جو اس سے قبل ایک کارروائی میں ہلاک ہوچکا ہے۔

ذرائع کا کہنا ہے کہ ملک زئی علی رحمان کے جمعیت علمائے اسلام (ف) سے وابستہ ہونے کے حوالے سے کوئی شواہد سامنے نہیں آئے۔ اس طرح اس بارے میں سامنے آنے والی سابقہ اطلاعات، جن میں اسے مقامی جے یو آئی (ف) رہنما قرار دیا گیا تھا اور کہا گیا تھا کہ اسے دہشتگردوں نے نشانہ بنایا، درست ثابت نہیں ہوئیں۔

بنوں اور ملحقہ علاقوں میں دہشتگردی کے خلاف کارروائیاں اور قانون نافذ کرنے والے اداروں کی سرگرمیاں جاری ہیں، جہاں سیکیورٹی ادارے مبینہ دہشتگرد نیٹ ورکس کے خلاف کارروائیاں کر رہے ہیں۔