ترکی میں ایران کیلئے جاسوسی کے الزام میں چھ افراد گرفتار

استنبول (ڈیلی اردو) ترکی کی سرکاری خبر رساں ایجنسی انادولو کے مطابق ترک حکام نے بدھ کو ایران کے لیے مبینہ جاسوسی کے الزام میں ایک ایرانی شہری سمیت چھ افراد کو گرفتار کر لیا ہے۔

رپورٹ کے مطابق یہ گرفتاریاں ترکی کی قومی خفیہ ایجنسی اور انسدادِ دہشت گردی پولیس کی جانب سے پانچ صوبوں میں کیے گئے مربوط آپریشنز کے بعد عمل میں آئیں۔

شبہ ظاہر کیا گیا ہے کہ ملزمان کے ایران کی پاسدارانِ انقلاب کے ارکان سے رابطے تھے اور وہ ترکی میں فوجی اڈوں اور دیگر حساس مقامات سے متعلق معلومات اکٹھی کر رہے تھے۔ انادولو کے مطابق انہوں نے جنوبی ترکی میں نیٹو کے انجرلیک ایئر بیس کی نگرانی بھی کی۔

تمام چھ افراد کو استنبول میں ایک جج کے سامنے پیش کیا گیا، جہاں عدالت نے سیاسی اور فوجی جاسوسی کے الزامات کے تحت انہیں عدالتی حراست میں بھیجنے کا حکم دیا۔ انقرہ میں ایرانی سفارت خانے کی جانب سے فوری طور پر کوئی ردِعمل سامنے نہیں آیا۔

یہ گرفتاریاں ایک ایسے وقت میں ہوئی ہیں، جب ایران پر ممکنہ امریکی فوجی حملے کے خدشات کے باعث خطے میں کشیدگی میں اضافہ دیکھا جا رہا ہے۔ ترک حکام نے ہمسایہ ملک ایران میں کسی بھی غیر ملکی مداخلت کے خلاف خبردار کرتے ہوئے کہا ہے کہ اس سے عدم استحکام پیدا ہو سکتا ہے اور مہاجرین کی نئی لہر جنم لے سکتی ہے۔