جمہوریہ کانگو میں بغاوت اور بزدلی کے الزامات، 66 فوجیوں کو سزائے موت

کنشاسا(ڈیلی اردو) جمہوریہ کانگو میں فوجی عدالت نے بزدلی، فوجی بغاوت اور احکامات ماننے سے انکار کے الزامات میں 66 فوجیوں کو سزائے موت سنا دی ہے۔ مقدمے میں مجموعی طور پر 71 فوجیوں کو پیش کیا گیا تھا، جن میں سے چار کو بری جبکہ ایک فوجی کو 10 سال قید کی سزا سنائی گئی۔

یہ فیصلہ مشرقی صوبے شمالی کیوو کے علاقے والیکالے میں واقع گومہ گیریژن کی فوجی عدالت نے سنایا۔ مقدمے کی سماعت 12 روز تک جاری رہی۔ سزا پانے والے تمام اہلکار کانگو کی فوج کی 3415ویں رجمنٹ سے تعلق رکھتے تھے، جنہیں 20 اکتوبر کو گرفتار کیا گیا تھا۔

عالمی میڈیا رپورٹس کے مطابق ان فوجیوں پر الزام تھا کہ انہوں نے مسلح باغیوں کے ساتھ جھڑپوں کے دوران اپنی فوجی پوزیشنیں چھوڑ دیں اور محاذ سے پسپائی اختیار کرتے ہوئے اعلیٰ حکام کے احکامات کی خلاف ورزی کی۔ فوجی حکام کا کہنا ہے کہ اس عدالتی کارروائی کا مقصد مشرقی علاقوں میں جاری فوجی آپریشنز کے دوران مسلح افواج میں نظم و ضبط بہتر بنانا اور احکامات کی پابندی یقینی بنانا ہے۔

مشرقی کانگو کئی دہائیوں سے مسلح تنازعات کا مرکز بنا ہوا ہے، جہاں حکومتی افواج کو مختلف باغی گروہوں کی مزاحمت کا سامنا ہے۔ ان میں فرنٹ فار دی ری فاؤنڈیشن آف دی نیشن (ایف آر این) نامی باغی اتحاد بھی شامل ہے، جس کا حصہ ایم 23 گروپ ہے۔ ان جھڑپوں کے نتیجے میں بڑے پیمانے پر شہری آبادی نقل مکانی پر مجبور ہوئی ہے اور خطے میں انسانی بحران بھی شدت اختیار کر چکا ہے۔

رپورٹس کے مطابق یہ پہلا واقعہ نہیں کہ کانگو میں فوجیوں کو محاذ چھوڑنے یا فوجی احکامات کی خلاف ورزی کے الزامات میں سزائے موت سنائی گئی ہو۔ گزشتہ ماہ بھی 27 فوجیوں کو اسی نوعیت کے الزامات میں سزائے موت دی گئی تھی۔

واضح رہے کہ کانگو کی حکومت نے مارچ 2024 میں تقریباً دو دہائیوں سے معطل سزائے موت کی پابندی ختم کر دی تھی۔ حکومت نے اس اقدام کا دفاع کرتے ہوئے اسے فوج میں غداری اور سنگین جرائم کی روک تھام کے لیے ضروری قرار دیا تھا، تاہم انسانی حقوق کی تنظیموں نے اس فیصلے پر تحفظات کا اظہار کیا ہے۔ دستیاب اطلاعات کے مطابق پابندی ختم ہونے کے بعد اب تک کسی سرکاری پھانسی کی تصدیق نہیں ہوئی۔