جنوبی وزیرستان: دہشت گردوں نے ایس ایچ او سمیت 6 پولیس اہلکار اغوا کر لیے

پشاور (نمائندہ ڈیلی اردو)  پاکستان کے صوبہ خیبر پختونخوا کے قبائلی ضلع جنوبی وزیرستان اپر کی تحصیل سراروغہ میں مسلح دہشت گردوں نے ایس ایچ او احمد شاہ سمیت چھ پولیس اہلکاروں کو اغوا کر لیا۔

ڈی پی او اپر وزیرستان کے مطابق ایس ایچ او سراروغہ احمد شاہ اپنے ساتھی اہلکاروں کے ہمراہ گولہ بارود کے دھماکے کے مقام سے واپس آ رہے تھے کہ راستے میں دہشت گردوں نے سڑک پر ناکہ بندی کر رکھی تھی۔

پولیس کے مطابق دہشت گردوں نے اہلکاروں کی گاڑی روک کر ایس ایچ او احمد شاہ اور ان کے پانچ ساتھیوں کو اغوا کر کے نامعلوم مقام پر منتقل کر دیا۔

ڈی پی او نے واقعے کی تصدیق کرتے ہوئے بتایا کہ مغوی اہلکاروں کی بازیابی کے لیے پولیس اور سکیورٹی فورسز نے علاقے میں سرچ آپریشن شروع کر دیا ہے، جبکہ مختلف مقامات پر ناکہ بندی مزید سخت کر دی گئی ہے۔

انہوں نے کہا کہ واقعے کی تحقیقات جاری ہیں اور اغوا کار دہشت گردوں کا سراغ لگانے کے لیے تمام دستیاب وسائل بروئے کار لائے جا رہے ہیں۔

پولیس حکام کے مطابق تاحال ایس ایچ او احمد شاہ اور دیگر مغوی اہلکاروں کے بارے میں کوئی اطلاع موصول نہیں ہوئی، جس کے باعث اہل خانہ میں شدید تشویش پائی جا رہی ہے۔

واقعے کے بعد سراروغہ اور گردونواح کے علاقوں میں سکیورٹی ہائی الرٹ کر دی گئی ہے، جبکہ قانون نافذ کرنے والے ادارے صورتحال پر کڑی نظر رکھے ہوئے ہیں۔