جنوبی وزیرستان میں جھڑپ، ایک ایس ایس کمانڈو اور 8 دہشت گرد ہلاک

راولپنڈی (ک م) صوبہ خیبر پختونخوا کے قبائلی ضلع جنوبی وزیرستان کے علاقے شین وارسک میں سکیورٹی فورسز نے آپریشن کرتے ہوئے کالعدم تنظیم تحریک طالبان پاکستان (ٹی ٹی پی)کے کمانڈر سمیت 8 دہشت گردوں کو ہلاک کردیا۔

جنوبی وزیرستان کے علاقے اعظم ورسک میں دہشت گردوں کے خلاف آپریشن میں سیکورٹی فورسز کا ایک اہلکار ہلاک اور تین اہلکار زخمی ہوگئے، ذرائع کے مطابق زخمیوں میں کیپٹن طحہٰ اور کیپٹن بلال شامل ہے۔#SouthWaziristan #Pakistan

— Shabbir Hussain Turi (@ShabbirTuri) April 5, 2023

پاکستانی فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے جنوبی وزیرستان کے علاقے شین وارسک میں انٹیلی جنس بیسڈ آپریشن کیا، آپریشن کے دوران سیکیورٹی اہلکاروں اور دہشت گردوں کے درمیان شدید فائرنگ کا تبادلہ ہوا۔

آئی ایس پی آر کا کہنا ہے کہ سکیورٹی فورسز کے ساتھ فائرنگ کے تبادلے میں کالعدم تنظیم کے کمانڈر جان محمد عرف چراغ سمیت آٹھ دہشت دہشت گرد ہلاک ہوگئے۔

ہلاک دہشت گردوں سے اسلحہ اور گولہ بارود بھی برآمد ہوا ہے۔ مارے گئے دہشت گرد سیکورٹی فورسز کے خلاف دہشت گردی کی کارروائیوں اور بے گناہ شہریوں کے قتل میں ملوث تھے۔

تاہم فائرنگ کے شدید تبادلے کے دوران راولپنڈی سے تعلق رکھنے والے 31 سالہ ایس ایس جی کمانڈو حامد رسول وطن پر قربان ہوگئے جبکہ دو افسران سمیت چار اہلکار زخمی ہوئے۔

ذرائع کے مطابق زخمیوں میں کیپٹن طحہٰ اور کیپٹن بلال شامل ہے۔

پاکستان کی سیکیورٹی فورسز دہشت گردی کی لعنت کے خاتمے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔