جنوبی وزیرستان میں خودکش حملے کا منصوبہ ناکام، بارود سے بھری گاڑی برآمد

وانا (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع جنوبی وزیرستان کے علاقے اعظم ورسک میں سیکیورٹی فورسز نے بروقت کارروائی کرتے ہوئے مبینہ خودکش حملے کا منصوبہ ناکام بنا دیا اور بارودی مواد سے بھری ایک ہائی ایس گاڑی برآمد کر کے ناکارہ بنا دی۔

سیکیورٹی ذرائع کے مطابق گاڑی کو ایک باغ میں چھپا کر رکھا گیا تھا اور اسے دھماکہ خیز مواد سے بھرنے کے ساتھ عام مسافر وین کی شکل دی جا رہی تھی تاکہ سیکیورٹی چیکنگ سے بچا جا سکے۔

ذرائع کا کہنا ہے کہ گاڑی کو وانا اور گردونواح کے گنجان آباد علاقوں میں استعمال کرنے کا منصوبہ تھا، تاہم سیکیورٹی فورسز نے بروقت کارروائی کرتے ہوئے اسے ناکارہ بنا دیا۔

حکام کے مطابق کارروائی کے دوران بڑی مقدار میں دھماکہ خیز مواد برآمد کیا گیا جبکہ علاقے میں مزید سرچ آپریشن بھی کیا گیا۔

سیکیورٹی فورسز کا کہنا ہے کہ واقعے کی تحقیقات جاری ہیں اور دہشت گردی کے خاتمے کے لیے کارروائیاں بلا تعطل جاری رہیں گی۔