جنوبی وزیرستان میں دہشت گردوں کی فائرنگ، قبائلی رہنما کے دو بیٹے ہلاک

واشنگٹن (ش ح ط) پاکستان کے شورش زدہ صوبہ خیبر پختونخوا کے قبائلی ضلع جنوبی وزیرستان کے علاقے کڑی کوٹ بازار میں نامعلوم مسلح دہشت گردوں کی فائرنگ کے نتیجے میں قبائل توجی خیل کے چیف ملک جمیل وزیر کے دو بیٹے ہلاک جبکہ ایک راہگیر زخمی ہو گیا۔

ڈی ایس پی وانا اصغر علی شاہ کے مطابق فائرنگ کے واقعے میں ہلاک ہونے والوں کی شناخت معین الدین اور نوید کے ناموں سے ہوئی ہے۔

واقعے کے فوراً بعد پولیس اور امدادی ٹیمیں موقع پر پہنچ گئیں اور لاشوں کے ساتھ زخمی راہگیر سید انور کو قریبی ہسپتال منتقل کر دیا گیا۔

پولیس کا کہنا ہے کہ حملہ آور کارروائی کے بعد فرار ہونے میں کامیاب ہو گئے جبکہ واقعے کی وجوہات جاننے کے لیے تحقیقات شروع کر دی گئی ہیں۔

ذرائع کے مطابق ملک جمیل وزیر قبائل توجی خیل کے چیف ملک ہیں اور ماضی میں بھی ان پر متعدد دہشت گردانہ حملے ہو چکے ہیں۔

یاد رہے کہ ستمبر 2024 میں بھی ملک جمیل وزیر کی گاڑی کو بم حملے کا نشانہ بنایا گیا تھا، جس میں ان کا ایک بیٹا ہلاک جبکہ ملک جمیل وزیر سمیت دو افراد زخمی ہوئے تھے۔

ذرائع کے مطابق چند ماہ قبل کالعدم تنظیم کے ایک کمانڈر کی ایک ویڈیو بھی سامنے آئی تھی، جس میں مبینہ طور پر ملک جمیل وزیر کو دھمکیاں دی گئی تھیں۔

واقعے کے بعد پولیس اور سکیورٹی فورسز نے علاقے کو گھیرے میں لے لیا ہے جبکہ حملہ آوروں کی گرفتاری کے لیے سرچ آپریشن شروع کر دیا گیا ہے۔