جنوبی وزیرستان میں دہشت گردوں کی فائرنگ، 2 قبائلی عمائدین ہلاک

جنوبی وزیرستان (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع جنوبی وزیرستان لوئر میں مسلح دہشت گردوں کی فائرنگ کے دو الگ واقعات میں دو قبائلی عمائدین ہلاک ہوگئے۔

پہلے واقعے میں تحصیل توئی خلہ کے علاقے زرملن کے مقام دواساراکئی میں نامعلوم مسلح دہشت گردوں نے فائرنگ کرکے دو افراد کو نشانہ بنایا۔

پولیس ذرائع کے مطابق دونوں افراد آلٹو کار میں گل کچ سے زرملن جا رہے تھے کہ راستے میں مسلح افراد نے ان پر فائرنگ کردی۔ حملے کے نتیجے میں دونوں افراد موقع پر ہی ہلاک ہوگئے، جبکہ حملہ آور فائرنگ کے بعد فرار ہونے میں کامیاب ہوگئے۔

پولیس کے مطابق ہلاک ہونے والوں کی شناخت ملک بادشاہ ولد خیال، سلیمان خیل شاخ کمرانی، اور حاجی گل کے نام سے ہوئی ہے۔ حاجی گل ٹھیکیدار تھے اور سلیمان خیل شاخ مورخان خیل سے تعلق رکھتے تھے۔

پولیس کا کہنا ہے کہ فائرنگ کے واقعے کی وجوہات فوری طور پر معلوم نہیں ہوسکیں۔ واقعے کے بعد پولیس نے علاقے میں تحقیقات اور نگرانی کا عمل شروع کردیا ہے، جبکہ حملہ آوروں کی تلاش بھی جاری ہے۔

واقعے پر اہل علاقہ نے گہری تشویش کا اظہار کرتے ہوئے حکومت اور متعلقہ اداروں سے مطالبہ کیا ہے کہ دونوں قبائلی عمائدین کے قتل کی شفاف تحقیقات کی جائیں اور ملوث مسلح دہشت گردوں کو گرفتار کرکے قانون کے کٹہرے میں لایا جائے۔

مقامی افراد کا کہنا ہے کہ وزیرستان میں بدامنی کے واقعات میں اضافہ تشویشناک ہے اور حکومت کو علاقے میں امن و امان کی بحالی اور شہریوں کے جان و مال کے تحفظ کے لیے مؤثر اقدامات کرنے چاہییں۔

وزیرستان کے سیاسی و سماجی حلقوں نے بھی دونوں افراد کے قتل کی شدید مذمت کرتے ہوئے کہا ہے کہ ایسے واقعات علاقے کے امن و استحکام کے لیے انتہائی نقصان دہ ہیں۔