جنگ بندی کے بعد لبنان میں 350 سے زائد حزب اللہ جنگجو ہلاک، اسرائیلی فوج

یروشلم (ڈیلی اردو) اسرائیلی دفاعی افواج (آئی ڈی ایف) نے کہا ہے کہ جنگ بندی کے بعد سے اب تک جنوبی لبنان میں 350 سے زائد جنگجو ہلاک کیے گئے جبکہ حزب اللہ کے زیرِ استعمال 1100 سے زیادہ اہداف کو نشانہ بنایا گیا۔

اسرائیلی فوج کے مطابق ان کارروائیوں میں فوجی مقاصد کے لیے استعمال ہونے والی عمارتیں، اسلحہ کے ذخیرے، لانچنگ پلیٹ فارمز اور دیگر عسکری تنصیبات شامل تھیں۔

فوج کا کہنا ہے کہ یہ کارروائیاں اسرائیل اور لبنان کے درمیان طے شدہ معاہدوں کو مدِنظر رکھتے ہوئے کی گئیں اور اسرائیلی شہریوں و فوجیوں کو لاحق خطرات کے خلاف آپریشن جاری رہیں گے۔

اسرائیلی فوج کی ترجمان ایلا واویہ نے ٹیلیگرام پر جاری بیان میں کہا کہ جنگ بندی کے باوجود حزب اللہ کے عسکری اہداف کے خلاف کارروائیاں جاری ہیں۔

اگرچہ 17 اپریل سے جنگ بندی نافذ العمل ہے، تاہم اسرائیل کی جانب سے لبنان کے مختلف علاقوں میں حملے جاری ہیں جبکہ ایران سے منسلک حزب اللہ بھی اسرائیلی اہداف پر حملوں کے بیانات جاری کرتا رہا ہے۔

لبنان کی وزارتِ صحت کے مطابق پیر تک اسرائیلی حملوں میں ہلاک ہونے والوں کی تعداد 2869 ہو چکی ہے، جن میں جنگ بندی کے بعد ہلاک ہونے والے درجنوں افراد بھی شامل ہیں۔