قائد حزب اختلاف پنجاب اسمبلی ‏حمزہ شہباز ای سی ایل سے نام نکلنے کے بعد لندن روانہ

لاہور (ویب ڈیسک) مسلم لیگ (ن) کے مرکزی رہنما اور پنجاب اسمبلی میں قائد حزب اختلاف حمزہ شہباز لندن روانہ ہوگئے۔

حمزہ شہباز شہباز قطر ائرویز کی فلائٹ 629 کے ذریعے لندن روان ہوئے جبکہ وہ قطر ائر لائن کی ہی فلائٹ 628 کے ذریعے 13 فروری کو وطن واپس پہنچیں گے۔

یاد رہے کہ حکومت نے حمزہ شہباز کا نام ایگزٹ کنٹرول لسٹ (ای سی ایل) میں ڈالا تھا اور یکم فروری کو لاہور ہائیکورٹ نے ان کا نام ای سی ایل سے نکالتے ہوئے 10 روز کے لیے بیرون ملک جانے کی اجازت دی تھی۔

قومی احتساب بیورو کی جانب سے حمزہ شہباز سے آمدن سے زائد اثاثے بنانے اور صاف پانی کیس میں پوچھ گچھ کر رہی ہے، اسی سلسلے میں نیب نے اُن کا نام ای سی ایل میں ڈالنے کی سفارش کی تھی۔

حمزہ شہباز نے گزشتہ سال قطر جانے کی کوشش کی تھی تاہم انہیں نام ایگزٹ کنٹرول لسٹ (ای سی ایل) میں ہونے کی وجہ سے لاہور ائرپورٹ پر روک دیا گیا تھا۔

حمزہ شہباز کے خلاف صاف پانی کمپنی اور اثاثہ جات کی تحقیقات جاری ہیں جب کہ اُن کے خلاف غیر قانونی پُل اور 56 کمپنیوں سے مبینہ تعلق کی تحقیقات ہو رہی ہیں.