خیبر، مہمند اور ٹانک میں سیکورٹی فورسز کے آپریشنز، کمانڈر سمیت متعدد دہشتگرد ہلاک

پشاور (ڈیلی اردو رپورٹ)  پاکستان کے شورش زدہ صوبے خیبر پختونخوا کے مختلف اضلاع خیبر، مہمند اور ٹانک میں سیکیورٹی فورسز نے حالیہ دنوں کے دوران شدت پسندوں کے خلاف کارروائیاں تیز کر دی ہیں۔ ان آپریشنز میں متعدد دہشتگرد ہلاک ہوئے ہیں جن میں اہم کمانڈر بھی شامل ہیں۔

خیبر

ذرائع کے مطابق قبائلی ضلع خیبر کی دور افتادہ وادی تیراہ کے علاقے برقمبر خیل میں گزشتہ روز سیکیورٹی فورسز اور دہشتگرد تنظیم مجلس عسکری کاروان کے شدت پسندوں کے درمیان جھڑپ ہوئی۔

جھڑپ کے دوران تنظیم کا کمانڈر عبدالرحمان عرف عبدو اور اس کا ساتھی احمد ہلاک ہو گئے۔

ذرائع کا کہنا ہے کہ دونوں شدت پسند علاقے میں تخریبی سرگرمیوں اور حملوں کی منصوبہ بندی میں ملوث تھے اور کافی عرصے سے سیکیورٹی اداروں کو مطلوب تھے۔

جھڑپ کے بعد سیکیورٹی فورسز نے علاقے کو گھیرے میں لے کر سرچ آپریشن مزید تیز کر دیا ہے تاکہ دیگر ممکنہ سہولت کاروں کو بھی گرفتار کیا جا سکے۔

باڑہ 

اسی ضلع میں ایک اور کارروائی کے دوران، باڑہ کے علاقے دمامہ نالہ میں سیکیورٹی فورسز نے انٹیلی جنس بیسڈ آپریشن (IBO) کے ذریعے دو انتہائی مطلوب دہشتگردوں کو ہلاک کر دیا۔

پولیس ذرائع کے مطابق کارروائی کے دوران دہشتگردوں کے قبضے سے بھاری مقدار میں اسلحہ، بارود اور مواصلاتی آلات برآمد ہوئے۔

فورسز نے علاقے میں مزید سرچ آپریشن کا دائرہ وسیع کر دیا ہے تاکہ دہشتگردوں کے نیٹ ورک کو مکمل طور پر ختم کیا جا سکے۔

مہمند

ضلع مہمند کی تحصیل امبار کے علاقے رامبٹ میں سیکیورٹی فورسز نے شدت پسندوں کی موجودگی کی اطلاع پر کارروائی کی۔

ذرائع کے مطابق فورسز نے دہشتگردوں کے ٹھکانوں کو نشانہ بنایا، جس کے نتیجے میں متعدد شدت پسند ہلاک اور زخمی ہو گئے۔

ابتدائی اطلاعات کے مطابق کارروائی کے وقت علاقے میں 20 سے 25 دہشتگرد موجود تھے، جن میں بعض مقامی کمانڈر بھی شامل تھے۔

سیکیورٹی فورسز نے علاقے کو گھیرے میں لے کر کلیئرنس آپریشن شروع کر دیا ہے تاکہ ممکنہ مزاحمت کاروں کو بھی پکڑا جا سکے۔

ٹانک

دوسری جانب ضلع ٹانک میں سیکیورٹی فورسز نے کارروائی کے دوران کالعدم تحریک طالبان پاکستان (ٹی ٹی پی) کے اہم دہشتگرد ایاز عرف عمر مخلص مہاجر کو ہلاک کر دیا۔

ذرائع کے مطابق ہلاک دہشتگرد کا تعلق مالاکنڈ کے علاقے سمر باغ (لوئر دیر) سے تھا اور وہ متعدد تخریبی کارروائیوں، بم حملوں اور فورسز پر حملوں میں ملوث رہا ہے۔

فورسز نے کارروائی کے بعد علاقے میں سرچ آپریشن جاری رکھا ہوا ہے تاکہ دہشتگرد کے دیگر ساتھیوں کا سراغ لگایا جا سکے۔