خیبرپختونخوا میں دہشت گردوں سے امریکی و نیٹو اسلحہ برآمد

پشاور (ڈیلی اردو) پاکستان فوج اور قانون نافذ کرنے والے اداروں نے شورش زدہ صوبے خیبرپختونخوا میں کارروائیاں کرتے ہوئے دہشت گردوں سے افغانستان میں استعمال ہونے والا امریکی اور نیٹو افواج کا اسلحہ برآمد کر لیا۔

سکیورٹی ذرائع کے مطابق یہ کارروائیاں صوبے کے مختلف اضلاع میں کی گئیں، اور اس دوران دہشت گردوں سے حاصل شدہ اسلحہ میڈیا کے سامنے بھی پیش کیا گیا۔

ذرائع نے بتایا کہ برآمد شدہ اسلحے میں ایم 4، ایم 16 اور دیگر جدید خودکار ہتھیار، نائٹ وژن گگلز اور دیگر جدید آلات شامل ہیں۔ اس کے علاوہ دھماکا خیز مواد اور تاریں بھی موجود ہیں، جو امریکی فوج اور نیٹو کے معیار کے مطابق ہیں۔

سکیورٹی ذرائع کے مطابق کالعدم تحریک طالبان پاکستان (فتنہ الخوارج) اس اسلحے کے ذریعے رات کے وقت بھی پاکستان فوج کو نشانہ بنا سکتے ہیں، جبکہ اسلحے میں اسٹیل ہیڈ گولیاں بھی شامل ہیں جو بلٹ پروف جیکٹ کو پار کر سکتی ہیں۔

ذرائع نے مزید کہا کہ یہ ہتھیار امریکی اور نیٹو افواج کے انخلا کے وقت چھوڑے گئے تھے اور دہشت گرد اب انہیں پاکستان میں قانون نافذ کرنے والے اداروں کے خلاف استعمال کر رہے ہیں، جبکہ ہتھیاروں پر واضح طور پر امریکی حکومت کی ملکیت درج ہے۔

واضح رہے کہ پاکستان کالعدم تحریک طالبان پاکستان (ٹی ٹی پی) سے وابستہ عسکریت پسندوں کو سرکاری طور پر خوارج کی اصطلاح سے پکارتا ہے۔