خیبرپختونخوا: 2025 میں دہشت گردی کے 1,588 واقعات، 502 افراد ہلاک

پشاور (ڈیلی اردو)  پاکستان کے شورش زدہ صوبے خیبرپختونخوا میں سال 2025 کے دوران دہشت گردی کے واقعات میں ہونے والے جانی نقصان کی تفصیلات سامنے آ گئی ہیں۔

کاؤنٹر ٹیررازم ڈیپارٹمنٹ (سی ٹی ڈی) کی رپورٹ کے مطابق رواں سال صوبے بھر میں دہشت گردی کے 1 ہزار 588 واقعات رپورٹ ہوئے، جن میں 223 عام شہری ہلاک اور 570 زخمی ہوئے۔

رپورٹ کے مطابق دہشت گردی کے واقعات میں137 پولیس اہلکار ہلاک اور 236 زخمی ہوئے۔

رپورٹ کے مطابق  فیڈرل کانسٹیبلری کے 124 اہلکار ہلاک اور 244 زخمی ہوئے، دیگر قانون نافذ کرنے والے اداروں کے 18 اہلکار ہلاک ہوئے۔

سی ٹی ڈی کے مطابق مختلف کارروائیوں کے دوران 348 دہشت گرد ہلاک کیے گئے۔

رپورٹ میں بتایا گیا ہے کہ دہشت گردی کے سب سے زیادہ 394کیسز بنوں ریجن میں درج ہوئے، جہاں:54 عام شہری ہلاک  اور 125 زخمی ہوئے۔ 41 پولیس اہلکار ہلاک اور 89 زخمی ہوئے۔

ڈیرہ اسماعیل خان ریجن میں 152 مقدمات درج کیے گئے، جہاں کارروائیوں کے دوران 137 دہشت گرد ہلاک ہوئے۔

شمالی وزیرستان میں 181 واقعات رپورٹ ہوئے، جن میں 38 شہری ہلاک اور 182 زخمی ہوئے۔

جنوبی وزیرستان میں 103 دہشت گردی کے واقعات میں 39 شہری ہلاک اور 86 زخمی ہوئے۔

سی ٹی ڈی رپورٹ کے مطابق مجموعی طور پر خیبرپختونخوا میں رواں سال دہشت گردی کے واقعات میں سیکیورٹی اہلکاروں سمیت 502 افراد ہلاک ہوئے۔