خیبر میں جرگہ مذاکرات کے بعد پاکستانی طالبان نے مغوی پولیس اہلکار کو رہا کردیا

باڑہ (نمائندہ ڈیلی اردو) پاکستان کے شورش زدہ صوبے خیبرپختونخوا کے قبائلی ضلع خیبر میں جرگے کے ذریعے ہونے والے مذاکرات کے نتیجے میں دہشت گردوں نے ایک ماہ قبل اغوا کیے گئے پولیس اہلکار عبدالوحد(واحد گل) کو رہا کردیا۔ پولیس اہلکار کو خیبر کی دور افتادہ وادی تیراہ کے علاقے اکاخیل سے اغوا کیا گیا تھا، جبکہ ان کی رہائی عوامی احتجاج اور مقامی دباؤ کے بعد ممکن ہوئی۔

پولیس کے مطابق اہلکار عبدالوحد کو اکبری پوسٹ سے اغوا کیا گیا تھا۔

ڈی پی او رائے مظہراقبال نے بتایا کہ تھانہ باڑہ کی حدود میں ایک نجی ہوٹل پر چھاپے کے دوران ایک مغوی شہری کو بازیاب کرایا گیا، جبکہ تاوان کی غرض سے اغوا میں ملوث دو پولیس اہلکاروں کو گرفتار کر لیا گیا، تاہم ایک اہلکار موقع سے فرار ہوگیا۔

ڈی پی او کے مطابق گرفتار اہلکاروں کو ملازمت سے برطرف کرکے ان کے خلاف مقدمہ درج کردیا گیا ہے۔ فرار پولیس اہلکار کی گرفتاری کے لیے علاقے میں ناکہ بندیاں کر دی گئی ہیں اور مقدمے کی تفتیش جاری ہے۔