خیبر میں فوجی قافلے پر طالبان کا حملہ، 4 اہلکار ہلاک، 5 زخمی، 15 لاپتہ

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع خیبر کی تحصیل باڑہ کے نواحی علاقے اکاخیل میں علی الصبح سیکیورٹی فورسز پر دہشت گردوں نے بڑا حملہ کیا ہے۔ اس حملے کی ذمہ داری کالعدم تحریک طالبان پاکستان (ٹی ٹی پی) نے قبول کر لی ہے۔

ابتدائی اطلاعات کے مطابق دہشت گردوں نے سیکیورٹی فورسز کے ایک قافلے کو نشانہ بنایا، جس کے نتیجے میں 4 اہلکار ہلاک اور 5 زخمی ہوگئے۔ زخمیوں کو فوری طور پر قریبی عسکری اسپتال منتقل کر دیا گیا ہے جہاں بعض کی حالت تشویش ناک بتائی جاتی ہے۔

سیکیورٹی ذرائع کے مطابق حملے کے بعد فورسز اور دہشت گردوں کے درمیان شدید فائرنگ کا تبادلہ ہوا، جس کے دوران علاقے میں دھماکوں کی آوازیں بھی سنی گئیں۔ واقعے کے بعد علاقے کو گھیرے میں لے کر سرچ آپریشن شروع کر دیا گیا ہے۔

اہم بات یہ ہے کہ 15 اہلکار حملے کے بعد تاحال لاپتہ ہیں۔ سیکیورٹی حکام کے مطابق ان اہلکاروں کی تلاش کے لیے اضافی دستے روانہ کر دیے گئے ہیں، جبکہ علاقے میں فضائی نگرانی بھی کی جا رہی ہے۔

ذرائع کا کہنا ہے کہ دہشت گردوں نے حملے کے لیے بھاری ہتھیاروں کا استعمال کیا، اور کارروائی کے بعد قریبی پہاڑی علاقوں کی طرف فرار ہوگئے۔

یاد رہے کہ تحصیل باڑہ، خیبر پختونخوا کے وزیرِ اعلیٰ سہیل آفریدی کا آبائی علاقہ ہے۔ حالیہ ہفتوں میں ضلع خیبر اور ملحقہ علاقوں میں دہشت گردی کے واقعات میں اضافہ دیکھا گیا ہے، جس کے بعد سیکیورٹی فورسز نے علاقے میں آپریشنز تیز کر دیے ہیں۔