خیبر پختونخوا: رواں سال مختلف کارروائیوں میں 955 دہشت گرد ہلاک

پشاور (نمائندہ ڈیلی اردو) خیبر پختونخوا میں رواں سال کے دوران انسدادِ دہشت گردی اقدامات کے حوالے سے سینٹرل پولیس آفس کی تفصیلی رپورٹ سامنے آ گئی ہے، جس کے مطابق مختلف آپریشنز اور انٹیلی جنس بیسڈ کارروائیوں میں مجموعی طور پر 955 دہشتگرد ہلاک کیے گئے۔

سینٹرل پولیس آفس سے جاری کردہ رپورٹ کے مطابق پولیس اور کاؤنٹر ٹیررازم ڈیپارٹمنٹ (سی ٹی ڈی) نے مشترکہ آپریشنز میں 423 دہشتگردوں کو ہلاک کیا، جبکہ سیکیورٹی فورسز کی جانب سے مختلف کارروائیوں میں 532 دہشتگرد مارے گئے۔ آپریشنز کے دوران بڑی تعداد میں اسلحہ، بارودی مواد، ڈیٹو نیٹرز، دستی بم اور دیگر جنگی ساز و سامان بھی برآمد کیا گیا۔

سی پی او پشاور کے مطابق ہلاک ہونے والوں میں 33 اہم دہشتگرد کمانڈر بھی شامل ہیں، جو مختلف حملوں، بم دھماکوں اور ٹارگٹ کلنگ میں ملوث تھے۔ رپورٹ میں بتایا گیا کہ دہشتگردوں کا تعلق شمالی و جنوبی وزیرستان، بنوں، ڈیرہ اسماعیل خان، مردان، کوہاٹ اور دیگر اضلاع سے تھا۔

اعداد و شمار کے مطابق رواں سال سب سے زیادہ کارروائیاں بنوں، ڈی آئی خان، شمالی و جنوبی وزیرستان اور خیبر میں کی گئیں، جہاں درجنوں دہشتگردوں کو ہلاک کیا گیا۔ جبکہ کرم، اورکزئی اور ملاکنڈ ڈویژن میں بھی پولیس، سی ٹی ڈی اور سیکیورٹی فورسز نے متعدد دہشتگردوں اور اہم کمانڈرز کو ٹھکانے لگایا۔

حکام کا کہنا ہے کہ صوبے میں انسدادِ دہشتگردی اقدامات مزید تیز کر دیے گئے ہیں اور خطرناک گروہوں کے خلاف آپریشنز بدستور جاری رہیں گے۔