خیبر پختونخوا: قبائلی اضلاع کے متعدد علاقوں کو بارودی سرنگوں سے صاف کر دیا گیا

پشاور (ڈیلی اردو) خیبر پختونخوا میں ضم قبائلی اضلاع میں بارودی سرنگوں کی صفائی کا عمل جاری ہے، ملاکنڈ، باجوڑ، مہمند، خیبر، اورکزئی، کرم اور شمالی و جنوبی وزیرستان میں متعدد علاقوں کو کلیئر کردیا گیا۔

سیکورٹی زرائع کے مطابق ضم شدہ قبائلی اضلاع میں بارودی سرنگوں کی صفائی کا عمل جاری ہے، ملاکنڈ اور باجوڑ کو بارودی سرنگوں سے صاف کردیاگیا ہے ،ضلع مہمند بھی بارودی سرنگوں سے پاک ہونے کے قریب ہے، ضلع مہمند میں 14 میں سے 13 مربع کلومیٹر رقبہ کو بارودی سرنگوں سے صاف کردیاگیا ہے۔ خیبر میں 12 میں سے 8 مربع کلومیٹر بارودی سرنگوں سے پاک کردیا گیا ہے۔

ذرائع کے مطابق اورکزئی میں 6 میں سے 5 مربع کلومیٹر کلیئر کیا گیا ہے، ضلع کرم میں 6 میں سے 4 کلومیٹر رقبے پر بارودی سرنگوں کا خاتمہ کر دیا گیا ہے، شمالی وزیرستان میں ابھی بھی بڑے رقبے پر بارودی سرنگیں موجود ہیں، دشوار گزار علاقے میں 37 میں سے 4 مربع کلومیٹر کا علاقہ کلیئر کیا جاچکا ہے۔اسی طرح جنوبی وزیرستان میں 62 میں سے 15 مربع کلومیٹر کا علاقہ صاف کیا جاچکا ہے۔

ذرائع کے مطابق خطرناک مہم کے دوران اب تک 37 سیکیورٹی اہلکار ہلاک ہوچکے ہیں، بارودی سرنگوں کی صفائی کےدوران 17 جوان زخمی بھی ہوئے، بارودی سرنگوں کی زد میں آکر 45 شہری ہلاک اور 85 زخمی ہوئے۔