ایران پر نئے حملے کے نتائج پہلے سے کہیں زیادہ سنگین ہوں گے، اسماعیل بقائی کی امریکہ اور اسرائیل کو تنبیہ

تہران (ڈیلی اردو) ایران کی وزارت خارجہ کے ترجمان اسماعیل بقائی نے خبردار کیا ہے کہ اگر امریکہ یا اسرائیل نے دوبارہ ایران پر حملہ کیا تو اس کے نتائج گزشتہ فوجی تصادم کے مقابلے میں کہیں زیادہ سنگین ہوں گے۔

سماجی رابطے کی ویب سائٹ ایکس پر اپنے بیان میں اسماعیل بقائی نے کہا کہ حقائق کو نظرانداز کرنا، تاریخ سے سبق نہ سیکھنا اور خطرناک راستے پر آگے بڑھتے رہنا ایک سنگین غلط اندازہ ثابت ہوسکتا ہے، جس کے نتائج ماضی میں دیکھے گئے حالات سے بھی زیادہ تباہ کن ہوں گے۔

ایرانی ترجمان نے اپنے بیان میں کسی مخصوص ممکنہ حملے کی تاریخ یا مقام کا ذکر نہیں کیا، تاہم ان کا یہ انتباہ ایسے وقت سامنے آیا ہے جب ایران اور امریکہ کے درمیان فوجی کشیدگی اور ممکنہ مذاکرات کے حوالے سے صورتحال غیر یقینی ہے۔

دوسری جانب پاسدارانِ انقلاب کی بری فوج کے کمانڈر محمد کرمی نے بھی مخالف فریقوں کو خبردار کیا ہے کہ وہ کسی غلط فہمی یا غلط اندازے کا دوبارہ ارتکاب نہ کریں۔ ان کے بیان کو ایران کی جانب سے ممکنہ نئے فوجی تصادم کے خلاف سخت انتباہ قرار دیا جا رہا ہے۔

ایران کے سپریم لیڈر مجتبیٰ خامنہ ای نے بھی اپنے پیغام میں گزشتہ 40 روزہ جنگ کے دوران ایران کے علاقائی ردعمل کا حوالہ دیتے ہوئے کہا کہ اگر ملک پر دوبارہ حملہ کیا گیا تو اس مرتبہ جواب کا دائرہ پہلے سے کہیں زیادہ وسیع ہوگا۔

ایرانی قیادت کے ان بیانات سے واضح ہوتا ہے کہ تہران کسی نئے حملے کی صورت میں صرف محدود دفاعی کارروائی تک خود کو پابند رکھنے کا عندیہ نہیں دے رہا، تاہم ایران کی جانب سے ممکنہ جوابی کارروائی کے اہداف، طریقۂ کار یا دائرہ کار کی کوئی تفصیلی وضاحت نہیں کی گئی۔