دادو: کورونا سے ہلاک ہونیوالے ہندو تاجر کی آخری رسومات میں خلل ڈالنے والے 3 ملزمان گرفتار

کراچی (ڈیلی اردو/بی بی سی) صوبہ سندھ کے ضلع دادو میں ایک ہندو تاجر سیٹھ کیول رام راٹھوڑ کی آخری رسومات میں خلل ڈالنے والوں کے خلاف مقامی تھانے میں مقدمہ درج کر لیا گیا ہے۔

دادو پولیس کا کہنا ہے کہ مقدمے کے اندراج کے بعد تین ملزمان کو گرفتار کیا گیا ہے۔

یاد رہے کہ گذشتہ روز کورونا وائرس کے باعث ہلاک ہونے والے ہندو تاجر سیٹھ کیول رام راٹھوڑ کی آخری رسومات ان کے مذہبی طریقہ کار اور ایس او پیز کے تحت ادا کی جا رہی تھیں جب چند علاقہ مکینوں کی جانب سے اس میں خلل ڈالنے کی کوشش کی گئی۔

پولیس کے مطابق آخری رسومات میں خلل ڈال کر اگنی سنسار روکنے کے لیے مداخلت اور بحرمتی کی کوشش کی گئی تاہم پولیس کی جانب سے مشتعل افراد کو بروقت منتشر کر دیا گیا۔

بعد ازاں دادو پولیس کی جانب سے ایسے عناصر کے خلاف قانونی کارروائی کرتے ہوئے سرکاری مدعیت میں چھ نامزد اور 20/25 نامعلوم ملزمان کے خلاف مقدمہ درج کر لیا گیا۔

پولیس نے مزید کارروائی کرتے تین نامزد ملزمان کو گرفتار کر لیا ہے جبکہ دیگر ملزمان کی گرفتاری کے لیے چھاپوں کا سلسلہ جاری ہے۔