دالبندین میں سیکیورٹی فورسز کی کارروائی، کالعدم بی ایل اے کے 6 دہشت گرد ہلاک

راولپنڈی (ڈیلی اردو رپورٹ) پاکستان کے شورش زدہ صوبے بلوچستان کے علاقے دالبندین میں سیکیورٹی فورسز نے کارروائی کے دوران کالعدم بلوچ لبریشن آرمی (بی ایل اے) سے تعلق رکھنے والے 6 دہشت گردوں کو ہلاک کر دیا۔

سیکیورٹی ذرائع کے مطابق کارروائی دہشت گردی کے خاتمے اور امن و امان کی بحالی کے لیے کی گئی۔ بتایا گیا ہے کہ ہلاک دہشت گرد ایک پہاڑی غار میں پناہ لیے ہوئے تھے جن پر فضائی نگرانی کے ذریعے مسلسل نظر رکھی جارہی تھی۔

ذرائع نے بتایا کہ قانون نافذ کرنے والے اداروں نے مناسب وقت پر ٹھکانے کو مؤثر انداز سے نشانہ بنایا، جس کے نتیجے میں 6 دہشت گرد ہلاک ہوئے۔

سیکیورٹی اداروں کے مطابق یہ کارروائی فورسز اور خفیہ ایجنسیوں کے درمیان بہتر ہم آہنگی اور مؤثر رابطے کا نتیجہ ہے۔ ان کا کہنا تھا کہ بلوچستان میں دہشت گردی کے خاتمے تک آپریشنز جاری رہیں گے۔

دو روز قبل وفاقی وزیر داخلہ محسن نقوی نے کہا تھا کہ کالعدم بی ایل اے کے دہشت گرد پاکستان کی یکجہتی اور امن کے دشمن ہیں، اور ان کے خلاف کارروائیاں جاری رہیں گی۔ 

ان کا کہنا تھا کہ “پاکستان کی سرزمین سے کالعدم بلوچ لبریشن آرمی کا خاتمہ کرکے دم لیں گے، بھارتی حمایت یافتہ دہشت گردوں کے مذموم عزائم کامیاب نہیں ہوں گے۔”

واضح رہے کہ 23 مئی کو ڈی جی آئی ایس پی آر لیفٹیننٹ جنرل احمد شریف چوہدری نے ایک پریس کانفرنس میں بتایا تھا کہ خضدار میں بچوں کی ہلاکت کے واقعے میں کالعدم بی ایل اے ملوث تھی۔ ان کے مطابق بھارت گزشتہ دو دہائیوں سے خطے میں دہشت گردی کے ذریعے عدم استحکام پیدا کرنے کی پالیسی پر عمل پیرا ہے۔

ڈی جی آئی ایس پی آر کے مطابق جنوری 2024 سے ملک میں دہشت گردی کے 4664 واقعات ہوئے جن میں سے 1612 بلوچستان میں پیش آئے۔ رواں سال اب تک 747 دہشت گرد مختلف کارروائیوں میں ہلاک ہوچکے ہیں، جن میں 203 بلوچستان میں مارے گئے۔