درہ آدم خیل میں سیکیورٹی فورسز کا آپریشن، 5 دہشت گرد اور 2 اہلکار ہلاک

واشنگٹن (ش ح ط) پاکستان کے شورش زدہ صوبہ خیبر پختونخوا کے ضلع کوہاٹ کے علاقے درہ آدم خیل کے پہاڑی علاقے تور چپر میں سیکیورٹی فورسز کے انٹیلیجنس بیسڈ آپریشن کے دوران فائرنگ کے تبادلے میں 5 دہشت گرد ہلاک ہو گئے۔

حکام کے مطابق کارروائی کے دوران شدید فائرنگ کا تبادلہ ہوا جس کے نتیجے میں سیکیورٹی فورسز کے 2 اہلکار ہلاک جبکہ 7 اہلکار زخمی ہوئے۔

سیکیورٹی ذرائع کا کہنا ہے کہ ہلاک ہونے والے دہشت گردوں کا تعلق کالعدم تحریک طالبان پاکستان (ٹی ٹی پی) کے طارق گیدڑ گروپ سے تھا، جو درہ آدم خیل کے علاقے تور چپر میں سرگرم تھے۔

آپریشن کے بعد علاقے کو گھیرے میں لے کر مزید مشتبہ عناصر کی تلاش کے لیے سرچ اور کلیئرنس آپریشن شروع کر دیا گیا ہے۔ حکام کے مطابق علاقے میں سیکیورٹی صورتحال پر کڑی نظر رکھی جا رہی ہے۔

ذرائع کا کہنا ہے کہ بروقت کارروائی کے باعث علاقے میں ممکنہ بڑے نقصان کو روکا گیا ہے، جبکہ سیکیورٹی مزید سخت کر دی گئی ہے۔