’دہشت گرد یہ جنگ ہار چُکے ہیں اور ہم یہ جنگ جیت چُکے ہیں‘ نگران وزیر اعظم انوارالحق کاکڑ

اسلام آباد (ڈیلی اردو) نگران وزیر اعظم انوارالحق کاکڑ نے کہا ہے کہ ’ڈیرہ اسماعیل خان میں حملہ کرنے والے دہشت گرد جنگ ہار چکے ہیں، ریاست جنگ جیت چکی، دہشت گردوں کی شکست کا صرف اعلان باقی ہے۔‘

دہشت گردی کے اس واقع میں زخمی ہونے والے افراد کی عیادت کے بعد نگران وزیرِ اعظم نے میڈیا سے بات کرتے ہوئے کہا کہ ’یہ ایک حملہ کریں گے ہم دس قدم آگے بڑھائیں گے، یہ لوگ کس سے لڑ رہے ہیں، ہمیں موت سے ڈرانا چاہتے ہیں؟ کوئی خوفزدہ نہیں ہوگا، جتنی دیر تک یہ لڑنا چاہتے ہیں یہ لڑ کر دیکھ لیں اپنی ہر خواہش پوری کر لیں۔‘

اُن کا مزید کہنا تھا کہ ’ہمارے کئی ہزار لوگوں نے اس جنگ میں اپنی جانیں دیں ہیں اور اس کے باوجود کئی ہزار اب اور تیار ہیں ان کے خلاف جنگ لڑنے کے لیے، ریاست ان کا مقابلہ پوری طاقت سے کرے گی۔‘