راولپنڈی میں دہشت گردوں کی فائرنگ سے پولیس کانسٹیبل ہلاک، افسر سمیت 2 اہلکار زخمی

راولپنڈی (ڈیلی اردو) راولپنڈی کے تھانہ پیرودھائی کے علاقے سی ڈی اے چوک پر نامعلوم موٹرسائیکل سواروں کی پولیس ٹیم پر فائرنگ سے کانسٹیبل خرم شہزاد ہلاک اور سب انسپکٹر منظور شہزاد اور کانسٹیبل محمد عمر ہارون زخمی شدید ہوگئے۔

حکام کے مطابق جڑواں شہروں راولپنڈی اسلام آباد کے سنگم پر واقع سی ڈی اے چوک کے قریب پیرودھائی پولیس کے سب انسپکٹر منظور شہزاد کانسٹیبل عمر ہارون اور کانسٹیبل خرم شہزاد کے ہمراہ اسنیپ چیکنگ ڈیوٹی پر موجود تھے کہ اسلام آباد کی جانب سے آنے والے دو نامعلوم موٹر سائیکل سواروں کو چیک کرنے کے لیے روکنا چاہا تو ملزمان نے اچانک فائرنگ شروع کردی۔

فائرنگ کے نتیجے میں خرم شہزاد موقع پر ہلاک ہوگیا جبکہ سب انسپکٹر اور کانسٹیبل زخمی ہوئے جنہیں ہسپتال منتقل کردیا گیا۔

اس دوران پولیس نے جوابی فائرنگ کی تاہم ملزمان شدید فائرنگ کرتے ہوئے فرار ہوجانے میں کامیاب ہوگئے ۔ فائرنگ کے دوران گولیاں سی این جی اسٹیشن کے قریب کھڑی گاڑی کو بھی لگیں جس سے گاڑی کی ونڈ اسکرین ٹوٹ گئی۔ اطلاع ملتے ہی پولیس حکام موقع پر پہنچے اور تحقیقات شروع کردیں۔

آئی جی پنجاب راؤ سردار علی خان نے فائرنگ کا نوٹس لیتے ہوئے آر پی او راولپنڈی سے واقعے کی رپورٹ طلب کر لی اور پولیس کانسٹیبل خرم شہزاد کے ہلاکت پر گہرے دکھ کا اظہار کیا ہے اور زخمی اہلکاروں کو فوری طبی سہولیات کی فراہمی یقینی بنانے کی ہدایت کی۔

کالعدم تحریک طالبان پاکستان نے واقعے کی ذمہ داری قبول کرتے ہوئے دعویٰ کیا ہے کہ حملے میں سب انسپکٹر سمیت چار پولیس اہلکار پلاک و زخمی ہوئے۔