روسی ڈرون رومانیہ میں رہائشی عمارت پر گر کر تباہ، دو افراد زخمی

بخارسٹ (ڈیلی اردو/نیوز ایجنسیاں ) روسی ڈرون رومانیہ کے جنوب مشرقی شہر گالاتی میں ایک رہائشی عمارت کی چھت پر گر کر تباہ ہو گیا، جس کے نتیجے میں دو افراد زخمی ہو گئے۔

رومانیہ کی وزارت دفاع کے مطابق 28 اور 29 مئی کی درمیانی شب روس نے یوکرین میں شہری اور بنیادی ڈھانچے کے اہداف پر نئے ڈرون حملے کیے، جو رومانیہ کی سرحد کے قریب ایک دریائی علاقے میں ہوئے۔

وزارت دفاع کے ایک بیان میں کہا گیا ہے کہ ان حملوں کے دوران ایک روسی ڈرون رومانیہ کی فضائی حدود میں داخل ہوا، جسے ریڈار کے ذریعے گالاتی شہر کے جنوبی حصے تک ٹریک کیا گیا۔ بعد ازاں یہ ایک اپارٹمنٹ بلڈنگ کی چھت پر گر گیا، جس سے آگ بھڑک اٹھی۔

گالاتی شہر رومانیہ کی یوکرین اور مالدووا کے ساتھ سرحدوں کے قریب واقع ہے۔

رومانیہ کی وزارت خارجہ نے اس واقعے کو’’روس کی جانب سے سنگین اور غیر ذمہ دارانہ اشتعال انگیزی‘‘ قرار دیا ہے۔ وزارت خارجہ کے مطابق رومانیہ نے اس واقعے سے متعلق اتحادی ممالک اور نیٹو کے سیکرٹری جنرل کو آگاہ کر دیا ہے اور اسے ڈرون شکن دفاعی نظام کی فراہمی تیز کیے جانے کا مطالبہ کیا ہے۔

رومانیہ، نیٹو، امریکہ اور یورپی یونین نے روسی حملے کی شدید مذمت کی ہے۔ رومانیہ نیٹو اور یورپی یونین دونوں کا رکن ہے۔ حالیہ مہینوں میں روسی ڈرونز اور جنگی طیاروں کی جانب سے نیٹو رکن ممالک کی فضائی حدود کی خلاف ورزی کے کئی واقعات سامنے آ چکے ہیں۔

یورپی یونین کے کمیشن کی صدر ارزولا فان ڈئر لاین  نے کہا ہے کہ روس نے رومانیہ کی فضائی حدود کی خلاف ورزی کر کے ’’ایک اور خطرناک حد عبور کر لی ہے۔‘‘

انہوں نے ایکس پر ایک بیان میں کہا، ’’ہم رومانیہ اور اس کے عوام کے ساتھ مکمل یکجہتی کا اظہار کرتے ہیں۔‘‘ نیٹو کے سیکرٹری جنرل مارک رُٹے نے کہا ہے کہ یہ عسکری اتحاد اپنے رکن ممالک کے ’’ایک ایک انچ‘‘ علاقے کا دفاع کرے گا اور رومانیہ کے ساتھ مکمل یکجہتی بھی برقرار رہے گی۔

انہوں نے کہا، ’’روس کا غیر ذمہ دارانہ رویہ ہم سب کے لیے خطرہ بن چکا ہے۔‘‘ مارک رُٹے نے مزید کہا کہ نیٹو اتحاد اپنی دفاعی اور مزاحمتی صلاحیتوں کو مزید مضبوط بنائے گا اور روسی جارحیت کے خلاف یوکرین کی حمایت جاری رکھے گا۔

ادھر روسی وزارتِ خارجہ کی ترجمان ماریا زاخارووا نے روس کے سرکاری میڈیا سے رومانیہ کے حوالے سے بات کرتے ہوئے مزید کہا ہے کہ ’ہم جو الزامات سنتے ہیں، خاص طور پر یورپی یونین کے ممالک میں ڈرون سے متعلق، وہ سب بے بنیاد ہیں، اس میں کوئی حقیقت نہیں، کوئی مواد یا ثبوت پیش نہیں کیا گیا۔‘