روس اور ایران شام میں دہشت گردی کے خلاف جنگ کی حمایت کریں، ترک صدر اردگان

انقرہ (ڈیلی اردو/این این آئی) ترک صدر رجب طیب اردگان نے کہا ہے کہ ان کا ملک شام میں دہشت گردیکے خلاف جنگ میں روس اور ایران کی حمایت کا خواہاں ہے۔

میڈیا رپورٹس کے مطابق وہ تہران میں شامی تنازع پر روس اور ایران کے ساتھ سہ فریقی سربراہ اجلاس میں گفتگو کررہے تھے۔

انھوں نے اس بات پر زور دیا کہ محض زبانی جمع خرچ اورالفاظ ہی کافی نہیں، ترکی مسلح دہشت گرد کرد گروہوں کے خلاف اپنی جنگ جاری رکھے گا اور اس بات کی پروا نہیں کی جائے گی کہ کون سا ملک اس جنگ میں اس کی حمایت کرتا ہے۔

صدر اردگان نے کہا کہ ہم روس اور ایران سے یہ توقع کرتے ہیں کہ وہ دہشت گردی کے خلاف جنگ میں ترکی کی حمایت کریں گے۔ وہ کئی ہفتے قبل خبردار کر چکے ہیں کہ انقرہ جلد ہی شام میں ایک نئی فوجی کارروائی شروع کر سکتا ہے۔ ان کا اشارہ کرد ملیشیا کے خلاف کارروائی کی طرف تھا۔

انھوں نے کرد وائی پی جی ملیشیا پر الزام عاید کیا کہ وہ شام کو غیر ملکی حمایت سے تقسیم کرنے کے اقدامات کر رہی ہے۔ ان کے بہ قول شامی عوام کو اسی صورت میں فائدہ ہوسکتا ہے کہ اس تنظیم کا قلع قمع کردیا جائے۔