روس کے تازہ حملوں میں یوکرین میں تین افراد ہلاک

کییف (ڈیلی اردو)  یوکرینی حکام نے اتوار کو اطلاع دی کہ کییف اور ماسکو کے  درمیان امریکی ثالثی میں جنگ بندی کے باوجود گزشتہ 24 گھنٹوں کے دوران روسی حملوں اور 150 جھڑپوں کے نتیجے میں تین افراد ہلاک ہوئے ہیں۔ 

امریکی صدر ڈونلڈ ٹرمپ نے جمعہ آٹھ مئی کو کہا تھا کہ روس اور یوکرین نے نو سے 11 مئی تک تین روزہ جنگ بندی پر اتفاق کیا ہے۔ یہ اقدام  ایک وسیع تر امن کوشش کے طور پر چار سال سے زیادہ عرصے سے جاری جنگ کے خاتمے کی کوشش ہے۔

گزشتہ چوبیس گھنٹوں کے دوران ژاپوریژیا، دنیپرو پیٹرووسک اور خیرسون، تینوں شہروں میں ایک ایک شخص روسی ڈرون حملوں میں مارا گیا۔ یہ بات متاثرہ علاقوں کے گورنرز کی طرف سے بتائی گئی۔

اُدھر یوکرین کے شمال مشرقی علاقے خارکیف کے گورنر اولیخ سینیہوبوف نے کہا کہ علاقائی  دارالحکومت اور قریبی بستیوں پر ہونے والے ڈرون حملوں میں دو بچوں سمیت آٹھ افراد زخمی ہوئے۔   

ریاستی ایمرجنسی سروس کے مطابق روسی فوج کی طرف سے دنیپرو پیٹرووسک خطے  میں اس کی ریسکیو گاڑیوں  میں سے ایک کو ڈرون حملے کا نشانہ بنایا گیا جس کے نتیجے میں اس کا 23 سالہ ڈرائیور زخمی ہو گیا۔ 

کییف کی فضائیہ نے کہا کہ روس نے  طویل فاصلے تک مار کرنے والے 27 ڈرون لانچ کیے۔ اور یہ کہ ڈرون حملوں کی یہ تعداد معمول سے کم تھی، تاہم فضائی دفاع نے تمام ڈرونز کو مار گرایا۔

یوکرین کے جنرل اسٹاف نے اپنی روزانہ کی بریفنگ میں کہا ہے کہ  گزشتہ 24 گھنٹوں کے دوران محاذِ جنگ پر 147 جھڑپیں ہوئیں۔

یوکرینی حکام نے تاحال امریکہ کی ثالثی میں طے پانے والی  جنگ  بندی کی مبینہ روسی خلاف ورزیوں پر عوامی طور پر کوئی تبصرہ نہیں کیا۔ 

دونوں فریقوں کے درمیان ایک، ایک ہزار جنگی قیدیوں کے تبادلے کا منصوبہ بھی اس جنگ بندی منصوبے میں شامل ہے۔