سعودی عرب میں کررونا وائرس کے باعث پھنسے عمرہ زائرین کی پاکستان واپسی کا عمل شروع

ریاض (مانیٹرنگ ڈیسک) سعودی عرب میں کررونا وائرس کے باعث لاک ڈاؤن کی وجہ سے وہیں رہ جانے والے عمرہ زائرین کی وطن واپسی کا عمل شروع ہوگیا ہے۔

عرب نیوز کے مطابق اتوار کو جدہ کے کنگ عبدالعزیز انٹرنیشنل ائیرپورٹ پر پاسپورٹ حکام کی جانب سے لاک ڈاؤن کے باعث سعودی عرب میں پھنس جانے والے عمرہ زائرین کی ان کے وطن واپسی کی کارروائی شروع کردی گئی ہے۔

The offices at #Jeddah's King Abdul Aziz International Airport are part of the procedures for #Umrah pilgrims whose visas have expired #SaudiArabia #coronavirus https://t.co/pbpruyNtrm

— Arab News (@arabnews) April 5, 2020

حکام کے مطابق وزارت حج و عمرہ اور وزارت صحت کے تعاون سے تمام احتیاطی تدابیر کے ساتھ مسافروں کو روانہ کیا جارہا ہے۔

شاہی فرمان کے تحت سعودی عرب میں ویزے کی معیاد ختم ہونے والے زائرین کو جرمانے اور قید کی سزاؤں سے استثنیٰ دیا گیا ہے۔

خیال رہے کہ سعودی عرب میں کورونا وائرس سے متاثرہ افراد کی تعداد 2300 سے زائد ہوچکی ہے جن میں سے 34 افراد ہلاک بھی ہوچکے ہیں۔

وائرس کے پھیلاؤ کو روکنے کے لیے سعودی عرب میں 15 مارچ سے غیر ملکی پروازوں کی آمدورفت روک دی گئی تھی جب کہ 23 مارچ سے ملک بھر میں 21 روز کے لیے لاک ڈاؤن کیا گیا ہے اور مکہ مکرمہ اور مدینہ منورہ کے لیے مزید سخت احکامات جاری کیے گئے ہیں۔

حفاظتی اقدامات کے تحت تمام مساجد بشمول مسجد الحرام اور مسجد نبویؐ کے اندرونی اور بیرونی حصے میں پنجگانہ نماز اور نماز جمعہ کی ادائیگی پر مکمل پابندی عائد کی جاچکی ہے تاہم اب حرم شریف میں مطاف کے حصے میں طواف کا سلسلہ دوبارہ شروع کردیا گیا ہے۔