سعودی عرب کا آبنائے ہرمز میں بحری آمدورفت کی بحالی کا مطالبہ، ایرانی خلاف حملوں کی مذمت

ریاض (ڈیلی اردو) سعودی عرب نے خطے میں جاری عسکری کشیدگی پر گہری تشویش کا اظہار کرتے ہوئے فریقین سے تحمل، کشیدگی میں کمی اور مزید تصادم سے گریز کی اپیل کی ہے۔

سعودی وزارتِ خارجہ نے سوشل میڈیا پلیٹ فارم ایکس پر جاری بیان میں کہا ہے کہ خطے کے تنازعات کا حل صرف سیاسی اور سفارتی کوششوں کے ذریعے ممکن ہے، اور اس مقصد کے لیے پاکستان کی ثالثی و سفارتی کوششوں کی حمایت کی جا رہی ہے۔

بیان میں زور دیا گیا ہے کہ آبنائے ہرمز میں بین الاقوامی بحری جہاز رانی کی آزادی کی بحالی نہایت اہم ہے تاکہ بحری آمدورفت دوبارہ معمول کے مطابق اور محفوظ انداز میں جاری رہ سکے۔

ادھر سعودی عرب کے ولی عہد و وزیرِاعظم محمد بن سلمان اور متحدہ عرب امارات کے صدر محمد بن زاید کے درمیان ٹیلیفونک رابطے میں خطے کی صورتحال پر تبادلہ خیال کیا گیا، جس میں سعودی قیادت نے یو اے ای کے خلاف حملوں کی مذمت کرتے ہوئے امارات کی سلامتی کے لیے مکمل حمایت کا اعادہ کیا۔

سعودی وزارتِ خارجہ نے ایک علیحدہ بیان میں ایران کی جانب سے مبینہ میزائل اور ڈرون حملوں کی سخت الفاظ میں مذمت کی ہے اور انہیں غیر شہری اور معاشی تنصیبات کو نشانہ بنانے کے مترادف قرار دیا ہے۔

دوسری جانب ایران نے متحدہ عرب امارات پر حملوں کی ذمہ داری سے انکار کرتے ہوئے کہا ہے کہ اس کا اس نوعیت کی کسی کارروائی کا کوئی منصوبہ نہیں تھا، تاہم بعض ایرانی میڈیا اداروں اور ہیکنگ گروپس کی جانب سے ان واقعات سے متعلق دعوے سامنے آئے ہیں۔