سعودی فضائیہ نے حوثیوں کے دو ڈرون تباہ کر دیئے

ریاض (ڈیلی اردو) سعودی عرب کی فضائیہ نے حوثی باغیوں کے 2 ڈرون مار گرائے۔

عرب اتحاد کی جانب سے جاری بیان کے مطابق حوثی باغیوں نے یمن سے 2 ڈرون سعودی عرب کی طرف بھیجے جنہیں کوئی نقصان پہنچانے سے قبل تباہ کردیا گیا۔ تباہ کئے گئے دونوں ڈرون کا ملبہ یمن کے علاقے میں گرا۔

بیان میں مزید کہا گیا کہ حوثی باغیوں نے ڈرون کے ذریعے سعودی عرب کے جنوبی علاقے کو نشانہ بنانے کی کوشش کی جسے سعودی فضائیہ نے بروقت کارروائی کرکے ناکام بنا دیا۔

حوثی باغی ڈرون اور میزائل حملوں سے اکثر سعودی عرب کے مختلف علاقوں کو نشانہ بنانے کی کوشش کرتے ہیں۔

سعودی عرب کی قیادت میں حوثی باغیوں کے خلاف عرب اتحاد کی کارروائیاں جاری ہیں اور متعدد حوثی باغیوں کو ہلاک اور ان کے ٹھکانوں کو تباہ کیا جا چکا ہے۔