شمالی وزیرستان اور مہمند میں دراندازی کی کوششیں ناکام، 13 دہشت گرد ہلاک

راولپنڈی (ک م) پاکستانی فوج کے شعبہ تعلقات عامہ (آئی ایس پی آر) کے مطابق شورش زدہ صوبہ خیبر پختونخوا کے قبائلی اضلاع شمالی وزیرستان اور مہمند میں پاک افغان سرحد پر دراندازی کی دو کوششیں ناکام بنا دی گئیں، جس کے دوران 13 دہشت گرد ہلاک ہو گئے۔

آئی ایس پی آر کے مطابق مہمند کے علاقے میں سرحد عبور کرنے کی کوشش کرنے والے خوارج کے ایک گروہ کی نقل و حرکت کا سراغ لگایا گیا، جس پر سیکیورٹی فورسز نے مؤثر کارروائی کرتے ہوئے بھارتی سرپرستی یافتہ فتنہ الخوارج کے 8 دہشت گردوں کو ہلاک کیا۔

بیان کے مطابق شمالی وزیرستان میں بھی پاک افغان سرحد پر دراندازی کی ایک اور کوشش ناکام بنائی گئی، جہاں شدید فائرنگ کے تبادلے میں 5 خوارج مارے گئے۔

آئی ایس پی آر نے کہا ہے کہ افغان حکومت اپنے شہریوں کو پاکستان میں دہشت گردی کے لیے استعمال ہونے سے روکے۔ سیکیورٹی فورسز ملکی سرحدوں کے دفاع کے لیے پرعزم ہیں اور علاقے میں مزید دہشت گردوں کی موجودگی کے خاتمے کے لیے کلیئرنس آپریشن جاری ہیں۔

بیان میں مزید کہا گیا ہے کہ “عزمِ استحکام” کے تحت دہشت گردی کے خلاف کارروائیاں پوری رفتار سے جاری رہیں گی اور بیرونی سرپرستی میں ہونے والی دہشت گردی کا مکمل خاتمہ کیا جائے گا۔

واضح رہے کہ پاکستان، کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے “خوارج” کی اصطلاح استعمال کرتا ہے۔