شمالی وزیرستان: جھڑپ میں ٹی ٹی پی کمانڈر اور ایک سیکیورٹی اہلکار ہلاک

راولپنڈی (ڈیلی اردو) صوبہ خیبر پختونخوا کے قبائلی ضلع شمالی وزیرستان کے علاقے ملک خیل میں خفیہ اطلاع پر سیکیورٹی فورسز کے آپریشن کے دوران پاک فوج کے حولدار ہلاک جبکہ فائرنگ کے تبادلے میں 2 دہشت گرد بھی مارے گئے۔

پاکستان فوج کے شبعہ تعلقات عامہ (آئی ایس پی آر) کے مطابق خفیہ اطلاع پر سیکیورٹی فورسز نے دہشت گردوں کے ٹھکانے پر آپریشن کیا، اس دوران فائرنگ کے تبادلے میں 2 دہشت گرد ہلاک ہوئے اور حولدار شہزاد رضا بھی ہلاک ہو گیا۔

آئی ایس پی آر کے مطابق آپریشن میں کالعدم تحریک طالبان پاکستان (ٹی ٹی پی) کا کمانڈر رحمت عرف خالد بھی مارا گیا، یہ دہشت گرد آئی ای ڈی بنانے کا ماہر تھا اور سیکیورٹی فورسز پر حملوں سمیت بھتہ، اغوا برائے تاوان اور ٹارگٹ کلنگ میں بھی ملوث تھا۔

آئی ایس پی آر کا کہنا ہےکہ سیکیورٹی فورسز نے آپریشن کے دوران اسلحےکا بڑا ذخیرہ بھی برآمد کرلیا۔