شمالی وزیرستان میں دہشت گردوں کے ساتھ جھڑپ میں سیکورٹی فورسز کے چار اہلکار ہلاک

اسلام آباد (ش ح ط) صوبہ خیبر پختونخوا کے قبائلی ضلع شمالی وزیرستان کی تحصیل میر علی کے علاقے خسیور میں خفیہ اطلاع پر سیکیورٹی فورسز کے آپریشن کے دوران چار اہلکار ہوگئے۔

سرکاری ذرائع کے مطابق خفیہ اطلاع پر سیکیورٹی فورسز نے دہشت گردوں کے ٹھکانے پر آپریشن کیا، اس دوران فائرنگ کے تبادلے میں چار اہلکار ہلاک ہوئے۔ ہلاک ہونے والوں میں بہاولنگر سے تعلق رکھنے والے حوالدار منور، لکی مروت سے تعلق رکھنے والے سپاہی ذکاءاللہ، کوہاٹ سے تعلق رکھنے والے سپاہی فرحان اور ایبٹ آباد سے تعلق رکھنے والے سپاہی شیراز شامل ہیں۔

شمالی وزیرستان کے سب ڈویژن میرعلی کے علاقے کرکڑئی میں سیکیورٹی فورسز اور دہشت گردوں کے مابین جھڑپ، سیکیورٹی فورسز کے 4 اہلکار ہلاک، فائرنگ کا تبادلہ جاری ہے۔ ادھر شمالی وزیرستان کے علاقے خیسور میں کرفیو نافذ کرنے کی اطلاعات۔ #TTP #NorthWaziristan #Pakistan @Natsecjeff

— Shabbir Hussain Turi (@ShabbirTuri) December 30, 2021

کئی گھنٹے تک جاری رہنے والی فائرنگ کے نتیجے میں علاقے میں شدید خوف و ہراس پھیل گیا۔

ذرائع نے مزید بتایا کہ فائرنگ کے تبادلے کے دوران دو دہشت گردوں کے مارے جانے کی بھی اطلاعات ہیں۔ دہشت گردوں کے ٹھکانے سے بھاری مقدار میں اسلحہ و گولہ بارود بھی برآمد کیا گیا۔

حکام نے بتایا کہ علاقے میں مزید دہشت گردوں کی ممکنہ موجودگی کے خلاف آپریشن جاری ہے۔

سکیورٹی فورسز کی جانب سے اگرچہ شمالی اور جنوبی وزیرستان میں وقتاً فوقتاً سرچ آپریشن اور کارروائیاں ہوتی رہتی ہیں لیکن اس کے باوجود دہشت گرد حملے جاری ہیں جس میں اب تک متعدد ہلاکتیں ہوچکی ہیں۔

مقامی افراد کا کہنا ہے کہ حملے کے بعد خوف کے باعث خیسور علاقے میں جزوی طور پر کرفیو نافذ ہے اور اب بھی وقفے وقفے سے فائرنگ کی آوازیں سنائی دے رہی ہیں، جس سے علاقے میں شدید خوف پھیل گیا ہے۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی، ترجمان محمد خراسانی نے دعویٰ کیا ہے کہ حملے میں سیکیورٹی فورسز کے سات اہلکار ہلاک گئے اور متعدد زخمی ہوئے۔