شمالی وزیرستان میں سکیورٹی فورسز کا آپریشن، 11 دہشت گرد ہلاک

راولپنڈی (ک م) پاکستان کے شورش زدہ صوبہ خیبر پختونخوا کے قبائلی ضلع شمالی وزیرستان میں انٹیلیجنس اطلاعات کی بنیاد پر سیکیورٹی فورسز کے آپریشن میں 11 دہشت گرد ہلاک ہوگئے۔

پاکستانی فوج کے شعبہ تعلقاتِ عامہ (آئی ایس پی آر) کے مطابق گزشتہ 48 گھنٹوں کے دوران دتہ خیل کے علاقے میں دہشت گردوں کے متعدد ٹھکانوں کو نشانہ بنایا گیا، جس کے دوران شدید فائرنگ کے تبادلے میں 11 دہشت گرد ہلاک ہوئے۔

ترجمان کے مطابق ہلاک دہشت گرد علاقے میں متعدد دہشت گرد کارروائیوں میں ملوث تھے جبکہ ان کے قبضے سے اسلحہ اور گولہ بارود بھی برآمد ہوا ہے۔

آئی ایس پی آر نے بتایا کہ علاقے میں موجود مزید ممکنہ دہشت گردوں کے خاتمے کے لیے سینیٹائزیشن آپریشن جاری ہے۔

مزید کہا گیا ہے کہ قومی ایکشن پلان اور وژن ’’عزمِ استحکام‘‘ کے تحت ملک بھر میں دہشت گردی کے خلاف کارروائیاں پوری شدت کے ساتھ جاری رہیں گی۔