شمالی وزیرستان میں سکیورٹی فورسز کے ہیڈکوارٹر پر خودکش حملہ، ہلاکتوں کا خدشہ

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع شمالی وزیرستان میں سکیورٹی فورسز کے ہیڈکوارٹر پر بڑا خودکش حملہ کیا گیا، جس میں ہلاکتوں کا خدشہ ظاہر کیا جا رہا ہے۔

ڈیلی اردو کو موصول اطلاعات کے مطابق شمالی وزیرستان کی تحصیل بویا میں فوج کے بویا بٹالین ہیڈکوارٹر کو بارود سے بھری گاڑی کے ذریعے نشانہ بنایا گیا۔ دھماکے کے فوراً بعد دہشت گردوں نے ہیڈکوارٹر میں دراندازی کی بھی کوشش کی۔

شاہدین کے مطابق دھماکے کی آواز 25 کلومیٹر دور میرانشاہ میں بھی سنی گئی، جبکہ ہیڈکوارٹر کے قریبی رہائشی علاقوں میں گھروں اور بازاروں کے دروازے اور شیشے ٹوٹ گئے۔ 

مقامی ذرائع کے مطابق دھماکہ اتنا خوفناک تھا کہ اس کی آوازیں میلوں دور تک سنائی گئی۔

ذرائع کے مطابق حملے کے بعد سکیورٹی فورسز اور حملہ آوروں کے درمیان شدید فائرنگ جاری رہی۔ پولیس اور سکیورٹی کی بھاری نفری فوری طور پر جائے وقوعہ پر پہنچ گئی، علاقے کو گھیرے میں لے کر سیکیورٹی ہائی الرٹ کر دی گئی اور اہم شاہراہ پر آمدورفت عارضی طور پر معطل کر دی گئی۔

ابتدائی اطلاعات کے مطابق خودکش حملے میں ہلاکتوں کا خدشہ ہے، جبکہ متعدد افراد کو مقامی ہسپتال منتقل کیا جا رہا ہے۔ سرکاری تصدیق تاحال سامنے نہیں آئی۔

پاکستانی فوج کے شعبۂ تعلقاتِ عامہ (آئی ایس پی آر) نے تصدیق کی ہے کہ شمالی وزیرستان میں ہونے والے خودکش حملے میں چار فوجی ہلاک ہوئے، جبکہ بچوں اور خواتین سمیت 15 بے گناہ شہری زخمی ہوئے۔

آئی ایس پی آر کے مطابق سکیورٹی فورسز کی جوابی کارروائی میں چار شدت پسند بھی ہلاک ہوئے۔

حملے کی ذمہ داری اتحاد المجاہدین پاکستان سے وابستہ خودکش بمبار اسکواڈ “اسود الحرب حذیفہ” نے قبول کر لی ہے۔

واضح رہے کہ رواں سال مئی میں پاکستان میں سرگرم تین بڑی کالعدم جہادی تنظیموں نے مشترکہ طور پر “اتحاد المجاہدین پاکستان” کے نام سے نیا عسکری اتحاد قائم کرنے کا اعلان کیا تھا، جس میں تحریک طالبان پاکستان (حافظ گل بہادر گروپ)، تحریک لشکرِ اسلام پاکستان اور حرکت انقلاب اسلامی پاکستان شامل ہیں۔

مزید تفصیلات کا انتظار ہے۔