شمالی وزیرستان میں سیکیورٹی فورسز کے قافلے کے قریب دھماکا، ہلاکتوں کی اطلاعات

میرانشاہ  (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع شمالی وزیرستان کے علاقے شوال میں سیکیورٹی فورسز کے قافلے کے قریب ہونے والے بم دھماکے میں ابتدائی اطلاعات کے مطابق 6 اہلکار ہلاک ہو گئے ہیں، جبکہ متعدد اہلکاروں کے زخمی ہونے کی بھی اطلاعات ہیں۔

مقامی ذرائع کے مطابق دھماکہ اُس وقت پیش آیا جب سیکیورٹی فورسز کا قافلہ شوال کے علاقے سے گزر رہا تھا۔ دھماکے کے بعد علاقے میں شدید فائرنگ کی آوازیں بھی سنی گئیں جبکہ سیکیورٹی فورسز نے پورے علاقے کو گھیرے میں لے کر سرچ آپریشن شروع کر دیا۔

ذرائع کا کہنا ہے کہ دھماکے میں ایک فوجی گاڑی کو نشانہ بنایا گیا، جس کے نتیجے میں جانی نقصان ہوا۔ تاہم ہلاکتوں اور زخمیوں کی حتمی تعداد کے حوالے سے سرکاری سطح پر تاحال کوئی بیان جاری نہیں کیا گیا۔

واقعے کے بعد زخمی اہلکاروں کو فوری طور پر قریبی فوجی مرکز منتقل کیا گیا جبکہ علاقے میں سیکیورٹی مزید سخت کر دی گئی ہے۔

شمالی وزیرستان خصوصاً شوال کا علاقہ ماضی میں بھی دہشت گردوں کی سرگرمیوں کے باعث حساس سمجھا جاتا رہا ہے، جہاں سیکیورٹی فورسز متعدد آپریشنز کر چکی ہیں۔

تاحال کسی گروپ نے حملے کی ذمہ داری قبول نہیں کی۔