شمالی وزیرستان: 72 گھنٹوں میں 4 کمانڈروں سمیت 21 دہشت گرد ہلاک

راولپنڈی (ک م) پاکستان کے شورش زدہ صوبہ خیبر پختونخوا کے قبائلی ضلع شمالی وزیرستان میں سیکورٹی فورسز کے آپریشنز میں چار اہم کمانڈروں سمیت 21 دہشت گرد ہلاک ہوگئے۔

پاکستانی فوج کے شعبۂ تعلقات عامہ (آئی ایس پی آر) نے دعویٰ کیا ہے کہ ضلع شمالی وزیرستان کے علاقے میر علی اور گرد و نواح میں گزشتہ تین روز کے دوران انٹیلی جنس کی بنیاد پر کیے گئے آپریشنز میں 21 دہشت گرد ہلاک کر دیے گئے ہیں۔

آئی ایس پی آر کے بیان کے مطابق سکیورٹی فورسز نے دہشت گردوں کے متعدد ٹھکانوں کو نشانہ بنایا، جس کے نتیجے میں 21 دہشت گرد مارے گئے، جن میں چار اہم دہشت گرد کمانڈر بھی شامل ہیں۔

بیان میں کہا گیا ہے کہ کارروائیوں کے نتیجے میں علاقے میں سرگرم دہشت گرد نیٹ ورک کو بڑا دھچکا پہنچا ہے۔

آئی ایس پی آر کے مطابق ہلاک ہونے والے دہشت گرد کمانڈر سکیورٹی فورسز اور شہریوں پر حملوں سمیت دہشت گردی کی متعدد کارروائیوں میں ملوث تھے۔

فوج کے شعبۂ تعلقات عامہ کا مزید کہنا ہے کہ حالیہ کارروائیوں کے بعد آپریشنز میں ہلاک ہونے والے دہشت گردوں کی مجموعی تعداد 48 ہو گئی ہے۔