صوابی میں پولیس کے ساتھ جھڑپ، کالعدم ٹی ٹی پی کے 2 دہشت گرد ہلاک

صوابی (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع صوابی میں پولیس اور دہشتگردوں کے مابین جھڑپ کے دوران کالعدم تحریک طالبان پاکستان (ٹی ٹی پی) کے دو دہشتگرد ہلاک ہو گئے۔

پولیس کے مطابق یہ واقعہ تھانہ ٹوپی کی حدود میں پیش آیا، جہاں پولیس اور دہشتگردوں کے مابین فائرنگ کا تبادلہ ہوا۔ ہلاک دہشتگردوں کی شناخت یاسر اور سعود الرحمٰن عرف سوید کے نام سے ہوئی، جو کالعدم ٹی ٹی پی کے سرگرم رکن تھے۔

ترجمان پولیس کے مطابق مذکورہ دہشتگرد چوکی کلابٹ پر ہینڈ گرینیڈ حملے میں ملوث تھے، جس کے نتیجے میں کنسٹیبل نور کمال شاہ ہلاک ہوئے تھے۔ ہلاک دہشتگردوں کے قبضے سے ہینڈ گرینیڈ، 2 پستول اور ایک 125cc موٹرسائیکل برآمد ہوئی۔

پولیس نے مزید کہا کہ علاقے میں سرچ آپریشن جاری ہے اور فورسز دہشتگردوں کے دیگر ساتھیوں کو پکڑنے کے لیے چوکس ہیں۔