عراق: سلیمانیہ میں داعش کے 7 ارکان گرفتار، وفاقی حکام کے حوالے

بغداد( ڈیلی اردو) عراقی کردستان کے شہر سلیمانیہ اور اس کے نواحی علاقوں میں سکیورٹی فورسز نے کارروائی کرتے ہوئے داعش سے وابستہ 7 افراد کو گرفتار کرلیا۔

سلیمانیہ کی اسائش سکیورٹی فورسز کے جنرل آپریشنز ڈائریکٹوریٹ کے مطابق کارروائی خفیہ معلومات کی بنیاد پر کی گئی۔ گرفتار افراد عراقی عدالتوں کو مطلوب تھے اور ان کے خلاف انسداد دہشتگردی قانون کی دفعہ 4 کے تحت کارروائی کی جا رہی ہے۔

حکام کے مطابق گرفتار افراد ماضی میں داعش کے ساتھ مسلح سرگرمیوں میں ملوث رہے ہیں۔ ساتوں گرفتار افراد کو 18 اگست کو مزید تفتیش اور قانونی کارروائی کے لیے ان کے مبینہ جرائم کے دائرہ اختیار کے مطابق عراقی وفاقی حکومت کے متعلقہ اداروں کے حوالے کردیا گیا۔