عراق میں پاپولر موبلائزیشن فورس کے 71 جعلی دفاتر بند،ڈرون اڑانے پر دہشگردی قوانین کے تحت کاروائی کا اعلان

بغداد (ڈیلی اردو) عراقی وزارت داخلہ نے ملک بھر میں پاپولر موبلائزیشن فورس (الحشد الشعبی) کے نام سے قائم 71 جعلی دفاتر بند کرنے کا اعلان کرتے ہوئے کہا ہے کہ بغیر اجازت پرواز کرنے والے کسی بھی ڈرون اور اسے اڑانے والے کے خلاف دہشت گردی کے قوانین کے تحت کارروائی کی جائے گی، خواہ اس کا تعلق کسی بھی گروہ سے ہو۔

وزارت داخلہ کے شعبہ تعلقات و میڈیا کے سربراہ میجر جنرل مقداد میری نے اسلحہ کو ریاستی کنٹرول میں لانے سے متعلق قومی کمیٹی کی پریس کانفرنس میں بتایا کہ حکام کے پاس اس وقت ملک بھر میں تقریباً 60 لاکھ اسلحہ کے ٹکڑوں کا ڈیٹا موجود ہے۔ انہوں نے کہا کہ ابتدا میں شہریوں کی جانب سے اسلحہ رجسٹریشن میں دلچسپی کم تھی، تاہم اب رجسٹریشن کے عمل میں نمایاں اضافہ ہوا ہے۔

مقداد میری کے مطابق اسلحہ رجسٹریشن کی آخری تاریخ 31 دسمبر 2026 مقرر ہے، جس کے بعد غیر رجسٹرڈ اسلحہ رکھنے والے افراد کو قانون کی خلاف ورزی کا مرتکب تصور کیا جائے گا۔

انہوں نے بتایا کہ ملک کے تمام صوبوں میں اسلحہ رجسٹریشن کے لیے 845 مراکز قائم کیے گئے ہیں۔ اب تک ایک لاکھ 60 ہزار سے زائد افراد کو اسلحہ رکھنے کے لائسنس جاری کیے جاچکے ہیں، جبکہ ایک لاکھ 43 ہزار اسلحہ ضبط یا تحویل میں لیا گیا ہے۔ حکام نے 2,668 چوری شدہ ہتھیار بھی برآمد کیے ہیں، جبکہ شہریوں کے پانچ لاکھ سے زائد ہتھیار رجسٹر کیے جاچکے ہیں۔