لنڈی کوتل کا رہائشی کالعدم تنظیم کی مبینہ سہولت کاری کے الزام میں گرفتار، تین روزہ ریمانڈ منظور

پشاور (ڈیلی اردو) انسداد دہشتگردی کی خصوصی عدالت نے کالعدم تنظیم کے لیے مبینہ سہولت کاری اور دہشتگردی سے متعلق سرگرمیوں کے مقدمے میں گرفتار ملزم محمد یاسین کو تین روزہ جسمانی ریمانڈ پر محکمہ انسداد دہشتگردی (سی ٹی ڈی) خیبر کے حوالے کردیا ہے۔

ملزم محمد یاسین کا تعلق ضلع خیبر کی تحصیل لنڈی کوتل کے علاقے سلطان خیل سے بتایا گیا ہے۔ اسے جمعہ کے روز انسداد دہشتگردی کی خصوصی عدالت میں پیش کیا گیا، جہاں تفتیشی افسر نے مؤقف اختیار کیا کہ ملزم مبینہ طور پر کالعدم تنظیم کے لیے سہولت کاری اور تربیتی سرگرمیوں میں ملوث رہا ہے۔

تفتیشی افسر کے مطابق ملزم سے اس کے مبینہ ساتھیوں، دیگر سہولت کاروں اور تنظیمی سرگرمیوں سے متعلق مزید معلومات حاصل کرنا مقصود ہیں۔ اسی بنیاد پر عدالت سے استدعا کی گئی کہ اسے تفتیش کے لیے 30 روزہ جسمانی ریمانڈ پر سی ٹی ڈی کے حوالے کیا جائے۔

عدالت نے تفتیشی افسر کے دلائل اور درخواست کا جائزہ لینے کے بعد ملزم کا تین روزہ جسمانی ریمانڈ منظور کرتے ہوئے اسے سی ٹی ڈی خیبر کی تحویل میں دے دیا۔

واضح رہے کہ جسمانی ریمانڈ تفتیش کے لیے دیا جاتا ہے اور اس مرحلے پر ملزم کے خلاف عائد الزامات ثابت شدہ جرم تصور نہیں ہوتے۔ مقدمے میں الزامات کی حتمی حیثیت کا تعین عدالتی کارروائی کے بعد ہوگا۔