لکی مروت میں سکیورٹی فورسز کا انٹیلی جنس آپریشن، کواڈ کاپٹر حملوں سے منسلک 4 مبینہ دہشتگرد ہلاک

لکی مروت(ڈیلی اردو) خیبرپختونخواہ کے شورش زدہ ضلع سکیورٹی فورسز نے لکی مروت میں انٹیلی جنس معلومات کی بنیاد پر کارروائی کرتے ہوئے کواڈ کاپٹر حملوں میں ملوث ہونے کے شبہے میں چار مبینہ دہشتگردوں کو ہلاک کر دیا۔ کارروائی کے دوران بھاری مقدار میں اسلحہ اور گولہ بارود بھی برآمد کرنے کا دعویٰ کیا گیا ہے۔

موصولہ اطلاعات کے مطابق آپریشن میں ایسے عناصر کو نشانہ بنایا گیا جن کے مبینہ طور پر ڈرون نما کواڈ کاپٹروں کے ذریعے کیے جانے والے حملوں سے روابط تھے۔ ہلاک ہونے والوں کی شناخت اور برآمد کیے گئے اسلحے کی تفصیلات تاحال سامنے نہیں آئیں۔ حکام کی جانب سے بھی کارروائی کے مقام اور دیگر تفصیلات کی باضابطہ وضاحت سامنے آنا باقی ہے۔

واضح رہے کہ اس سے قبل لکی مروت کے علاقے شاہباز خیل میں موٹر سائیکل سوار مسلح افراد نے پولیس اہلکار ممتاز کو فائرنگ کرکے شدید زخمی کر دیا تھا، جو بعد ازاں ڈسٹرکٹ ہیڈکوارٹر اسپتال تاجہ زئی میں زخموں کی تاب نہ لاتے ہوئے ہلاک ہوگئے۔ واقعے کے بعد پولیس اور محکمہ انسداد دہشتگردی نے کارروائی کرتے ہوئے اس حملے میں ملوث دو مبینہ ٹارگٹ کلرز کو بھی ہلاک کرنے کا دعویٰ کیا تھا۔