لکی مروت میں فوجی گاڑی پر دھماکا، کیپٹن سمیت 6 اہلکار ہلاک، ایک شدید زخمی

اسلام آباد (ش ح ط) صوبہ خیبر پختونخوا کے ضلع لکی مروت میں دہشت گردوں کے بارودی سرنگ کے دھماکے میں ایک کیپٹن سمیت چھ اہلکار ہلاک جبکہ ایک اہلکار شدید زخمی ہوگیا ہے۔

ڈیلی اردو کے مطابق بروز اتوار کو لکی مروت کے علاقے سلطان خیل میں فوج کے اہلکار معمول کے مطابق ایک گاڑی میں گشت کر رہے تھے کہ ان کی گاڑی ایک بارودی سرنگ سے ٹکرا گئی جس سے مکمل طور پر گاڑی تباہ ہوگئی اور کیپٹن فراز سمیت 6 اہلکار ہلاک اور ایک شدید زخمی ہوگیا ہے۔

ریسکیو ذرائع کے مطابق لاشوں اور زخمی کو طبی امداد کی فراہمی کے لیے فوری طور پر ہسپتال منتقل کردیا گیا اور حملہ آوروں کی تلاش شروع کردی گئی۔

سیکورٹی فورسز کی بھاری نفری نے جائے وقوعہ پر پہنچ کر علاقے کی ناکہ بندی کردی۔