لکی مروت: پولیس موبائل پر دہشتگردوں کا حملہ، اے ایس آئی اور تحریک طالبان پاکستان کے 2 حملہ آور ہلاک

ڈی آئی خان (سید توقیر حسین زیدی) صوبہ خیبر پختونخوا کے ضلع لکی مروت میں پولیس موبائل پر شرپسندوں کے حملے کے دوران اسسٹنٹ سب انسپکٹر ہلاک جبکہ کانسٹیبل زخمی ہو گیا، جوابی کارروائی میں 2 دہشت گرد مارے گئے۔

تفصیلات کے مطابق کراچی پشاور انڈس ہائی وے پر دہشت گردوں نے پولیس موبائل پر فائرنگ کی جس کے نتیجے میں اسسٹنٹ سب انسپکٹر (اے ایس آئی) محمد شاہ خان ہلاک جبکہ ایلیٹ فورس کانسٹیبل انوار اللہ شدید زخمی ہو گئے۔

لکی مروت :- :-شہید پی اے ایس آئی محمد شاہ کی نماز جنازہ پولیس لائن لکی مروت میں سرکاری اعزاز کے ساتھ ادا کردی گئی.

پولیس کے چاق و چوبند دستے نے شہید کو آخری سلامی پیش کی۔ ڈی پی او عمران خان نے شہید کے جسد خاکی پر پھول چڑھائے اور شہید کےایصال و ثواب کے لئے دعائیں کی گئی۔ pic.twitter.com/r3QiUPOc5G

— KP Police (@KP_Police1) May 9, 2021

پولیس نے جوابی کارروائی کرتے ہوئے فرار ہوتے دہشت گردوں کا تعاقب کیا جس میں فائرنگ کے تبادلے میں 2 دہشت گرد بھی مارے گئے۔

ایس ایچ او نوید نواز کے مطابق دہشت گردوں کی شناخت نہیں ہو سکی، شرپسند موٹرسائیکل پر سوار تھے جنہوں نے تھانہ ڈاڈیوالہ کی پولیس موبائل کو نشانہ بنایا۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی۔

ترجمان نے تصدیق کی ہے کہ پولیس کی فائرنگ سے ان کے ساتھی ابوبکر اور القاعدہ مارے گئے ہیں۔