ماسکو: کار دھماکے میں روسی جنرل ہلاک

ماسکو (ڈیلی اردو) روس کے دارالحکومت ماسکو میں ایک کار کے نیچے نصب دھماکہ خیز مواد پھٹنے کے نتیجے میں ملک کے ایک اعلیٰ فوجی افسر لیفٹیننٹ جنرل فانیل سروروف ہلاک ہو گئے۔ جنرل سروروف روسی مسلح افواج کے آپریشنل ٹریننگ ڈائریکٹوریٹ کے سربراہ تھے۔

روس کی انویسٹیگیٹیو کمیٹی کے مطابق دھماکہ پیر کی صبح یاسینیوا اسٹریٹ پر واقع پارکنگ لاٹ میں ہوا، جب جنرل گاڑی میں موجود تھے۔ کمیٹی نے کہا کہ تفتیش کار مختلف پہلوؤں کی جانچ کر رہے ہیں، جس میں یہ امکان بھی زیرِ غور ہے کہ یہ کارروائی یوکرینی خفیہ اداروں کی منصوبہ بندی تھی، تاہم یوکرین کی جانب سے اس پر کوئی تبصرہ نہیں کیا گیا۔

روسی میڈیا کے مطابق یہ دھماکہ ایک رہائشی عمارت کے قریب ہوا۔ 

یاد رہے کہ دسمبر 2024 میں بھی یوکرین کی سکیورٹی سروس نے ایک اعلیٰ روسی افسر لیفٹیننٹ جنرل ایگور کیریلوف کو ہلاک کرنے کی ذمہ داری قبول کی تھی، جو اپنے وقت کے روسی فوجی نیوکلیئر، حیاتیاتی اور کیمیائی دفاع کے سربراہ تھے۔