مردان میں سی ٹی ڈی کا آپریشن، ٹی ٹی پی کے 2 دہشت گرد ہلاک

مردان (نمائندہ ڈیلی اردو) خیبر پختونخوا کے ضلع مردان میں کاؤنٹر ٹیررازم ڈیپارٹمنٹ (سی ٹی ڈی) نے سرچ آپریشن کے دوران کارروائی کرتے ہوئے کالعدم تحریک طالبان پاکستان (ٹی ٹی پی) کے دو موٹر سائیکل سوار دہشت گردوں کو ہلاک کر دیا۔

ترجمان سی ٹی ڈی کے مطابق کارروائی مردان کے علاقے کنڈہ پل نزد اکبر خان کلے، بہلولے روڈ، تھانہ ساڑو شاہ کی حدود میں کی گئی، جہاں سی ٹی ڈی انٹیلیجنس اور ایس ڈبلیو اے ٹی ٹیمز کے اہلکار پہلے سے موجود تھے۔

اس دوران دو مشتبہ موٹر سائیکل سوار تیز رفتاری سے آتے دکھائی دیے۔ اہلکاروں نے انہیں رکنے کا اشارہ کیا تو موٹر سائیکل سواروں نے فائرنگ شروع کر دی، جس پر فورسز کی جوابی کارروائی میں دونوں حملہ آور مارے گئے۔

سی ٹی ڈی کے مطابق ہلاک دہشت گردوں کی شناخت نعمان عرف مراد عرف غزنوی ولد علی مراد اور سہیل عرف چرسی ولد زیر نواز کے ناموں سے ہوئی ہے۔

ترجمان کے مطابق دونوں دہشت گرد پولیس اہلکار ہیڈ کانسٹیبل امجد، کانسٹیبل اقرار سید اور ایک راہگیر طفل احتشام کی ہلاکت سمیت چوکی بھڑوچ پر حملے اور دیگر دہشت گردی کے مقدمات میں ملوث تھے۔

سی ٹی ڈی نے علاقے کو گھیرے میں لے کر سرچ آپریشن مزید وسیع کر دیا ہے۔